近幾年多咗內地旅客去元朗消費,加上區內年輕人口增加,唔少大型連鎖電器店同埋化妝品等大商戶都唔執輸,喺區內最旺街道之一嘅教育路搶住開舖。單係今年就好罕有錄到呢類個案,個別舖位租金被搶高超過八成,其中韓國人氣電器品牌就租咗該條街道一個地舖連閣樓,月租約24萬元,租金升幅約85%。

近年元朗教育路地舖大執位,連鎖電器產品店及化妝品店數目大增。

遊客心聲
來自深圳的袁先生指出,到元朗購物可省回車錢及時間。

街坊心聲
居於元朗洪水橋的Lemon表示,教育路數碼影音店舖選擇多,根本不用到九龍買。

今年連鎖店搶租元朗教育路地舖個案

四成商戶 瞄準內地客

劉Sir問番啲代理老友,佢話教育路1號嘅千色廣場附近人流最旺,由嗰段街道起至與西裕街交界,有成50多個地舖,賣嘅嘢好多都係內地旅客最鍾意嘅藥物、電子產品同埋化妝品等,呢類商戶數目高佔約二十間,佔嗰段街約四成。

睇番兩年前,呢類商戶比例佔兩成都無,依家條街地舖呎租閒閒地大約150至200元,比兩年前平均呎租只約120元升咗唔少。

來自深圳嘅袁先生話,「以前去香港旅遊購物只係去旺角同埋銅鑼灣,不過,教育路賣嘅日用品同影音產品舖頭愈來愈多,近期索性淨係去元朗買,慳番啲車錢同時間」。而住喺元朗洪水橋嘅九十後Lemon都認為,教育路數碼影音店舖選擇多,根本唔使出九龍買。

電器舖爭位 租貴85%

元朗出名多老字號餅家,但近年區內地舖租金係咁升,有啲都頂唔住貴租搬走咗。睇番美聯旺舖同市場資訊,原本由一間老牌餅店租用嘅教育路26至34號地下A舖同埋閣樓,面積大約1,100及300方呎,幾個月前畀韓國電器品牌以每月約24萬元租咗,呎租約170元,比起前租金升咗85%。

此外,部分賣民生食品及用品嘅小型商戶,亦被連鎖店取代,原由一間麵包店租緊嘅15至19號地下部分,每個月租金12萬元唔使,早排已經獲連鎖零食店以每月約20萬元預租,呎租約160元,新租金升近70%。而由粥麵店租用嘅9至13號地下部分,都畀連鎖化妝品店以每月約50萬元預租,呎租約170元。