上月話過隻中國軟件國際（00354）業績有保證，結果上周公布的中期業績的確唔失禮，尋日有報道指內地政府機構一定要用正版軟件，即市一度挾到去2.52元，惟其後升幅收窄至2.1%，以2.41元收市，距離今年高位2.61元仲有水位，且技術上比起金蝶國際（00268）無咁超買，兩者現價14日RSI各處59同81，不妨（目及）實中軟。

中軟今年上半年收入增長16.9%至13.7億元人仔，純利增長21.1%至7,230萬元人仔，可見IT需求持續快速增長。根據IDC市場研究報告，佢喺政府行業解決方案市場連續五年保持前三位，而今次內地政府機構禁用老翻，配合「中國軟件正版化」版權保護政策，長遠嚟睇絕對有利公司盈利能力。睇番幅圖，股價自上月起沿住10日線上升，期間出現幾次假跌穿，但依然能夠處於上升軌，走勢非常硬淨，今趟升浪應該唔會得咁短癮！

中軟國際（00354）

阻力位：2.61元

支持位：2.17元