市場對聯儲局九月開始減少買債的憂慮繼續發酵，資金從亞洲市場撤走的情況有惡化迹象。尋日，菲律賓披索跌到兩年半低位，印尼盾更番到去○九年水平，加埋印度盧比，簡直係串燒三兄弟。今個月，三隻貨幣兌美元都貶值約一成，除咗搵港紙換披索的「菲律賓姐姐」，會因為咁變相換賺多咗高興之外，三地股市的股民，真係苦過「弟弟」。

太陽日誌2013/8/28

尋日一菲兩印股市單日跌幅都超過3%，連帶日韓台股市亦都統統見紅，港股跌130點，報21,874點，成交輕微多過前日，有479億，沽空佔大市成交比例，由9.84%反彈上11.41%，九月期指報21,767點，低水107點，即使計埋除息因素都低水54點，拋現貨、沽空兼大低水轉倉，簡單講，口淡淡的大孖沙佔市場上多數。

退市指標快將出爐

展望由今日去到下個月十七、十八日聯儲局議息，可以影響到華爾街對美國退市睇法嘅events唔多，最有威力嘅，應該係下周三、五（4及6號）的聯儲局褐皮書，以及八月非農業就業職位增長及失業率，缸邊客屆時記得留意。

業績期進入尾聲，新奧能源（02688）半年賺7.37億元人民幣，按年升1%，剔除債券市值變動及匯兌等非經營因素，核心業務收益有19.8%增長，較大行估計多12.5%，不過淡友一樣無情講，隊低5.4%，報38.45元，說到底基金當港股係ATM，繼續由outperfomer身上攞錢走，業績好插少啲，業績唔對辦直頭一股唔留。

睇番新奧上半年燃氣銷售增長22.8%，稍低過管理層全年目標25%，尋日朝分析員會議上，據聞管理層拍心口話下半年可以追番目標。公司上半年落實九個新項目，已經提前達到年初預期，一三年市盈率17倍，筆者睇好燃氣股，亦相信會係少數未來幾年肯定交到增長的中資板塊之一，但新奧與同業比較唔算最平，尋日又穿過250日線37.9元，守唔住或者會番到年初起步位34至35元，想入貨不妨等等。

恒大（03333）半年核心盈利升22%至46.6億元人民幣，好過預期，股價升3%，報3.4元。恒大舊年開始調整投資組合，增加一、二線城市投資去到四成二，食正國五條撳都撳唔住個樓市，加埋本身三線城市準備推出項目多數位置唔錯，分析員估明年開始，毛利率會明顯改善，由上半年的27.2%上番三字頭，一三年市盈率5.1倍。

恒大向來係惹火尤物，亦唔止一次被淡友狙擊，但睇番半年手頭現金大增67%去到420億人民幣，淨負債比率由84%降至58%（計埋上半年發的永續債券則為76%），財政條件明顯好咗唔少。

正面啲睇，有條件入貨買多啲地皮，亦即係意味住一旦回購，亦唔會係得個講字。而自從恒大六月份的銷售數據出咗，賓架心裏有數之後，七月初恒大的沽空都明顯收斂咗，尋日勁升都係得5球沽空，佔成交5.9%左右，少咗一批攔路虎，加埋又向來比中海外（00688）、華潤置地（01109）等基金重倉股資產折讓較大，睇情況短期應該有條件追落後。