樓價持續高企，連凶宅、無契盤等平價樓樓價亦愈升愈高，市場缺乏筍貨下，有資深投資者變陣投資舊樓「博收購」。另類投資者陳應佳月前以140萬元購入嘅銅鑼灣禮雲大廈半契樓，近日再斥資170萬元買埋另外半份業權，實用呎價9,000餘元，佢話呢類物業分分鐘身價倍升。

陳應佳集齊銅鑼灣禮雲大廈一伙業權「博收購」。（資料圖片）

投資者陳應佳近月入市情況

雖然近排樓市持續呆滯，但投資者仍然積極尋寶「執平野」。陳應佳近日同劉Sir傾開，話月前經拍賣場以140萬元買入嘅禮雲大廈頂層一個半份業權住宅單位，當時比開拍價98萬元高逾四成。

睇好實呎價達兩萬

近日陳應佳再以170萬元買埋另外餘下嘅業權，比之前買入價貴逾兩成，不過，佢話睇準發展商密密收購呢幢物業，所以買入「博收購」，又話依家收購實用呎價已去到約莫1.6萬元，睇好未來可達約兩萬元水平。

佢先後兩次購入價合共約310萬元，按單位實用面積338方呎計，實用呎價約9,172元，若最終能以目標收購價易手，將較買入價升值逾倍。現時單位以約1.28萬元租出，回報率約4.95厘。「依家辣招稅咁高，買呢類舊樓博收購，唔駛等幾年先買賣。」佢話，近日以220萬元沽出持貨兩年嘅大埔翠屏花園A座低層7室，實用面積約280方呎，實用呎價約7,857元，比購入價帳面升值百萬元。

太子租盤回報8.7厘

另外，市區細價租盤難求，有代理同劉Sir講，前排有個公司租客，為幫員工搵宿舍，一口氣租咗太子舊樓崇雅樓低層嘅五個套房，其實個單位裝修無耐，實用面積535方呎，業主今年一月用286萬元購入，原本諗住分開五間房租出去，每間收4,200至4,800元租；而今次個平均實用呎租去到成38.9元，好多藍籌屋苑呎租都去唔到呢個價，租金回報逾8.7厘。

市區工廈有價有市，荔枝角新光工業大廈頂層單位，尋日透過環亞拍賣以一口價200萬元成交，實用呎價約5,333元，屬好價。