仲有幾日就到九月，市場預料聯儲局將啟動退市，由上星期資金流報告所見，唔單止直接受累於息口變化的債券市場錄得八周以來最大淨流出，達74億美元，連環球股票市場都見有123億美元淨流出，創下○八年六月以來最大淨流出紀錄，當中大部分係美股ETF指數基金，可見今次資金唔係純粹因為美國經濟進入復甦周期而棄債從股咁簡單，而係經歷長期超低息後的一次大規模去槓桿行動，大孖沙齊齊趕喺九月十七、十八日FOMC開會前見倉拆倉。

太陽日誌2013/8/27

綜合大行預測好孩子業績（港元）

唔單止咁，七月份美國新屋銷售，按月急挫13.4%去到39.4萬間，樓價中位數25.72萬美元，亦已去番今年一月水平，過去幾年靠聯儲局狂印銀紙托番起嘅樓市，又再見到腳軟迹象。

事實上，美國按揭息率同債息掛鈎，美債息在加息預期下由1.6厘上到2.9厘，同期美國30年定息按揭息率亦由3.35厘彈上4.58厘。樓市唔掂的連鎖反應，經歷過九七至○三年樓市跌浪的香港人一清二楚，唔使多講。

退市陰霾揮之不去

老實講，以美國當前財政情況，退市唔易，伯南克最有可能係施展七月初同一伎倆，出口術話市場高估就業市場改善程度，總之拖得就拖，實行降低市場退市預期，但未來兩個半星期，去槓桿氣氛持續，只怕股市即使唔插插，都好難避免愈玩愈縮。上星期二港股勁插近五百點，個市成交有636億，尋日反彈141點，交投縮到得473億，見微知著，個市得定唔得，由基金低迷的入市意欲，應可看出端倪。

發改委話上周一，經已收妥合生元（01112）、美贊臣、多美滋、雅培與富仕蘭（美素佳兒）、恒天然等六家奶粉商涉及壟斷案的罰款，合共6.6873億元人民幣，仲無一間提上訴。成日話「坦白從寬，抗拒從嚴」，睇嚟奶粉壟斷事件就咁告一段落，說明合生元股價可以當無事發生過一樣，並非無因。

統一（00220）來自方便麵收益大減，以為由康師傅（00322）掀起的價格戰，戰況慘烈，意外地主角康師傅中期成績比預期好，期內主打的方便麵業務持續增長，銷售額升6.38%，達19.93億（美元．下同），毛利率僅跌0.25個百分點至29.18%，純利都有2.52%升幅。期內，康師傅整體盈利跌31.4%至1.97億元，主要係去年第一季因收購康百聯盟的收益所致，扣除一次性項目，實質有2.7%增長。

基於棕櫚油、聚酯粒及糖價，近日都延續着一一年開始的跌勢，對維持毛利率有利，期內虧損的方便食品，主要是品牌行銷推廣開支上影響，下半年估計有所改善，全年康師傅可望至少達到4.2至4.3億元盈利預期，講到底31倍PE，加上依家通街跳樓貨下，短期番得到20元水平，捧場客都應該收貨。

專門生產嬰兒手推車及兒童汽車安全座位的好孩子（01086），半年賺9,700萬元（港元．下同），按年跌3.4%。公司產品主力出口，歐債危機之下，期內公司來自北美和歐洲市場的收益顯著下跌28.1%和26.4%，最終「大數」只係微跌，一來係內地銷售保持活力，收益有8.4%增長，最意外是上半年毛利率顯著改善，由19.1%升至23.1%。

姑勿論點，雅士利（01230）拉埋閘，可炒一孩政策放寬的股票買少見少，好孩子勝在品牌唔錯兼無負債，尋日業績後隊落2.98元再拗腰見3.36元近全日高位收，看來近月炒唔上都怕咗份業績，隨住歐美生意料見底，16倍PE唔算貴，短期值得留意。