愈嚟愈多內地客鍾意去新界大商場消費，而最近深圳羅湖口岸嘅上水區就最受惠。其中新地（00016）區內嘅上水廣場，裏面嘅鐘錶珠寶及化妝品等品牌，都同市區差唔多，同時個場今年頭半年每月每方呎平均營業額去到2,868元，係佢哋集團期內咁多個商場中，成績最好。由於仲有唔少商戶都想傾預租，所以商場舊租戶為咗留低，都願意續租，加幅約24%，而新進駐商戶嘅租金，就比舊租金有成36%升幅。

新地鍾秀蓮（左二）認為，雖然上水區將有新商場開幕，料對區內零售氣氛有相輔相成的正面作用。

上水廣場租戶不乏國際品牌。

新地代理租務部總經理鍾秀蓮同劉Sir講，依家上水廣場租戶唔少都有來頭，鐘錶名店包括有太子珠寶鐘錶同周大福等，而化妝品店亦不乏國際品牌，顧客有如置身銅鑼灣及尖沙咀等核心消費區，依家商場呎租介乎約180至500元。

每呎營業額系內最勁

由於生意好，該集團都因應市況加租，續租幅度約24%，而新進駐商戶仲進取，較前租金有約36%升幅，租金理想，佢都承認有研究將上址部分寫字樓轉作零售用途。

鍾總話，商場○四年時平均每方呎營業額僅約507元，今年首七個月平均每月每方呎營業額已升到2,868元，今年四月份曾達至3,400元商場單月新高，計番頭半年平均每月每方呎營業額能成為該集團旗下眾商場最高。

佢仲話，深圳文錦渡口岸約三年前關閉後，尋日正式重新運作，上水廣場為把握黃金機會，早排同一間跨境巴士營運商達成合作協議，安排往來上水廣場及文錦渡穿梭巴士服務。

上述穿梭巴士服務，每日達雙邊班次達60至80班，料可因而刺激該商場下半年人流達3,700萬人次，營業額達16億元，兩數字按年同期將有約26%及28%升幅，其中來自廣州嘅林小姐話，上水區消費品品牌好齊，同市區差唔多。

觀塘天星蝕半成放售

近排工廈市道麻麻，聽講幾個月後上會嘅觀塘天星中心，有低層單位呎價嗌6,000元蝕住放售，涉900萬元，比今年頭入貨價低近5%。