樓市有幾靜大家有目共睹，最近有投資者終於忍唔住，為求甩貨不惜減價或平手離場。好似資深投資者黎汝遠或有關人士，劉Sir知道佢減價20萬元，以360萬元沽出北角美麗閣單位。另將軍澳首都有一組投資客上周已「明賺實蝕」沽出1伙，啱啱又以594萬元沽出另1個高層單位，計落頂多平手離場。

將軍澳首都錄投資者微賺出貨。(資料圖片)

資深投資者黎汝遠減價沽出北角美麗閣單位。（資料圖片）

投資者減價及平手出貨實錄

市場大吹淡風，唔知係咪班投資客都聞到陣燶味，實行甩貨至上，最近明顯多咗減價或平手出貨個案。

黎汝遠仍賺百四萬

有代理老友同劉Sir講，上述美麗閣高層B室，單位建築/實用面積450/354方呎，業主對後市無乜憧憬，減價20萬元，以360萬元成交，建築/實用呎價8,000/10,169元，低市價5%。

劉Sir睇番註冊處資料，呢個單位業主係DRAGON HOME ASIA LIMITED，公司董事包括資深投資者黎汝遠。雖然今次單位以低價沽出，不過黎汝遠早於一○年四月樓市未爆升之前，以220萬元購入上址，所以至今帳面都賺咗約140萬元。

不過，又唔係個個投資者都咁精明。劉Sir代理老友爆料，上述將軍澳首都3座左翼高層D室，建築/實用面積926/705方呎，成交價594萬元，建築/實用呎價6,415/8,426元，原業主係一組投資者，於○八年初以563.9萬元買入，今次沽貨帳面只係賺大約30.1萬元，扣除持貨開支，相信平手離場。

尚巒扣使費無肉食

其實呢一組投資者今次能夠平手出貨，已經可以話「有進步」，事緣佢哋上星期先沽出上址同層另一個單位，成交價約610萬元，個單位約五年升值僅3萬元，即係幾近「淨蝕」使費。

此外，唔好話要大賺，部分業主「微賺」都收貨。世紀21北山嚴智贇話，大坑尚巒高層B室以1,090萬元成交，建築/實用呎價14,514/19,746元，原業主一○年三月購入價大約1,008萬元，至今帳面僅賺大約82萬元，扣除使費相信「無肉食」。