近排曝光率驚人的順風光電（01165），經常喺升幅榜見到佢，長炒長有，尋日因收購消息，又再以近全日高位3.44元收市，急升一成，短線如果可突破埋五十二周高位3.56元，或企穩10日線3.24元，下站阻力上移到3.8元。

順風從事製造及銷售太陽能電池片、太陽能硅晶片同太陽能組件，近期亦有拓展更具潛力的下游太陽能發電項目，好似上月推介時話過佢同海潤光伏訂立框架協議，周日就落實斥95萬元人仔收購海潤京運通95%權益，將在甘肅省參與發展一個年產能70兆瓦的太陽能發電站項目，加加埋埋佢今年掃咗唔少項目，有助改善營運表現同盈利能力。公司去年收入倒退46.3%至10.59億元人仔，但主要受累於美國及歐盟的雙反（反傾銷及反補貼）調查，令到太陽能產品平均售價下跌，不過早前中國輸歐光伏產品已經達成每瓦特0.56歐元的價格承諾協議，相信今年市價再大幅下調嘅機會唔大。

順風光電（01165）

阻力位：3.8元

支持位：3.0元