Fundman睇市：吉汽 備受大戶睇好

本周Jackson Hole央行行長年會，傳統上會為年底前美國貨幣政策把把脈，可惜聯儲局主席伯南克，好大機會做埋呢半年就拜拜，因此選擇避席，而歐英行長亦都唔到，在缺乏意見指標下，美債息短期恐怕是易升難跌，對美國股市頗為不利。

美國退市，對中港股市是好是壞？似乎並無百分百的答案，短期而言，八月至今的中港股市，就因為美股憂慮退市，資金回流而明顯跑贏華爾街三大指數。長遠而言，過去幾年美國牽頭狂印銀紙，歐日爭相追隨，但中國為○九年四萬億基建投資救經濟的後遺症，收拾殘局，影子銀行及地方政府透過理財產品變賣債務的問題，尚待解決，美國QE對中國經濟直接的刺激有限。

地產股再跌空間有限

反而，外向形經濟的香港，效果明顯得多，物業價格在超低息環境下升至歷史高位。不過，自特區政府使出辣招使得物業交易量大減下，本港樓市應該已過了升勢最急勁的時間，但經歷過九七及沙士等大波幅，今次股市也先知先覺，至少恒生地產股分類指數，自○七年升至40,024點的歷史高位後，過去六年都無跟隨樓價向上，尋日報30,203點，較高峰仍低兩成五，意味即使樓價真的要掉頭回落，地產股已經有足夠折讓提供安全緩衝，未必百分百跟跌。

黑開有條路，債券又報錯價，個個笑光証連環烏龍事件，但滬深股市尋日不跌反升，看來肥手指事件中的真正損失，可能較預期細。港股主板成交比上周五勁縮235億元，得443億元，再陷入買賣兩閒的牛皮悶局，恒指臨尾市跟隨低開的歐洲股市，跌54點，收報22,463點。焦點圍繞一眾業績股，中期盈利遜預期的百盛（03368）挫9.4%，報3.19元。

汽車股有炒作，上半年內地汽車業累積銷售2.85萬億元人民幣，按年增16.1%，料整個行業稅前收益升20.2%，較年初分析員預測理想。華晨（01114）中期成績對辦，管理層對未來兩年的銷售發表樂觀預測，亦令基金經理對汽車股睇法有改變。

港交所（00388）披露資料顯示，摩通上星期入市掃入467萬股吉汽（00175），持股量升至5.02%的需予披露水平。吉汽星期四將出中期業績，摩通咁敏感時刻仲加注，原因唔使多講。早排摩通報告，預測吉汽半年賺13億元人仔，比坊間估計高6%，按年升80%，比長汽（02333）的74%增幅更勁。

持續理想的每月銷售數字，加上年底前將推出富豪XC90及S60L車款，相信都係摩通睇好吉汽嘅理由，更最重要嘅係，摩通認為吉汽未來幾年的強勁增長，有機會將學似長汽一樣，出現PE由5倍升到18倍的「估值牛市」，目標仲睇到7元咁話。