香港零售舖位租金已經最少四個季度都企喺全球最貴，今年第二季本港舖位租金平均達到每方呎超過2,800元，比第二位嘅美國紐約高出約41%，繼續最癲。不過，實際上第二季本港舖位租金比第一季未有升跌，已經開始反映到近月內地豪客嚟香港掃奢侈品少咗，鐘錶珠寶店少咗搶租，唔少一線街舖租金升幅已經無以前咁癲。

商戶搶租核心消費區舖位減少，令租金升幅明顯放緩。(資料圖片)

銅鑼灣謝斐道有地舖放盤，意向呎價約5.4萬元，比去年入貨價加約三成多。（資料圖片）

全球五大商舖呎租最貴城市

平均呎租逾二千八元

劉Sir收到世邦魏理仕啱啱出嘅報告，今年第二季香港核心零售區商舖呎租，又再成為全球最貴嘅城市，平均呎租約2,813元，租金同上季差唔多，但依然都係咁貴。

主因之一係舊年有51間新零售商嚟香港開設新店，香港奢侈品牌數目亦係全球最多，該公司香港商舖服務部執行董事連志豪話，呢類商戶需求仲好大，相信繼續支持主要地區舖租。至於仲有無得升，就要睇市況。

個報告提到，香港次季一線街舖呎租一年間累升差唔多12%，但第二季比首季就無升跌，不過都比第二位嘅美國紐約平均呎租約1,983元，高約41%，證明香港舖租金仲好貴。

但係近排部分地區舖租升幅開始放緩，早前喺西洋菜南街1N號嘅兆萬中心地下1及2號舖，由連鎖個護理用品店租用，每月約60萬元，呎租只約521元，比起個舖之前月租金僅升約12%，反映未來本港舖租有危機。

謝斐道舖嗌近八千萬

不過，一線旺區銅鑼灣街舖仍不乏捧場客，該行鄧錦華話，區內謝斐道440號一個地舖，近住拉麵店一蘭，業主意向月租約14.2萬元，呎租近100元，同時嗌放盤，意向價約7,980萬元，呎價約5.4萬元，同舊年入貨價加約三成多。而利嘉閣林彥釗都話，同區景隆街30至34號地下7號舖都放售，業主意向價大約1.2億元，圍起嚟呎價約12萬元。