上周內地話要打擊醫藥領域的商業賄賂，搞到一眾醫藥股捱打，但暴炒妹留意到隻同仁堂國藥（08138）股價尋頂多時，上周五逆市再升5.4%，收報14.76元，即市高見14.9元，創上市新高，而佢五月以招股價3.04元掛牌以來，走勢一浪高於一浪，喺無蟹貨隱憂下，後市應該有得諗。

同仁堂國藥今年上半年多賺71.5%至9,346萬元，收入升1.02倍至2.8億元，其中香港銷售收入激增兩倍至1.86億元。期內公司完成一項靈芝系列產品的研發，正在進行註冊，料可進一步增加收入來源。至於未來發展，同仁堂國藥銀彈充裕，揸住8.5億元現金，持續擴充唔成問題。查實公司自去年底起已經唔喺內地批發保健品，由於自產「安宮牛黃丸」足以支撐整體收入，所以少咗中國分部對業績嘅影響唔大，而呢次內地打擊賄賂亦都唔關佢事，可以放心跟進吓。

同仁堂國藥（08138）

阻力位：16.0元

支持位：13.5元