SUN勢力：江銅正面因素未反映

近期美國醞釀退市，對債市和股市造成打擊，但個別跟經濟周期關連性較大的金屬價格未受影響，LME期銅價由六月底的6,602美元低位回升，上周五升至7,374美元，至於內地現貨銅溢價更較年初升逾兩倍至每噸200美元，升勢凌厲。

銅價前景改善，最受惠於當然是內地大型銅商江西銅業（00358），公司近年受銅價及經濟下滑雙重打擊，去年業績倒退逾兩成，中期業績亦唔慌好，早在四月時已講明半年盈利有機會跌逾五成，但控股股東江銅集團早前大手增持，絕不手軟。

內地經濟要保底，低殘板塊趁機反彈，個別鋼材水泥股由六月低位彈高四五成，江銅則只回升約兩成半，相當落後，仲未全面反映銅價持續回暖的因素。既然市場早就預咗上半年業績差，股價上周升穿15元後買盤依然積極，上周五一試低位14.76元後，即市彈回15.44元近高位收，可耐心收集。