上星期五，中港股市因為光大証券隻「肥手指」無風起浪，據知今次搞出大頭佛的團隊，上星期五全體停手等照肺，錯盤貨基本上無流過出街，不過光証都唔係坐響度等埋數，上周五股指期貨，該行的未平倉合約升超過七千張，看來唔少貨底做咗對沖。

太陽日誌2013/8/19

綜合大行預測高鑫業績（人民幣）

周末光証同上海證交所話當日掃貨用咗72.7億元（人民幣．下同），收市輸緊1.94億，老友話滬綜指當日由跌1%，兩分鐘內倒升5.6%，重磅內銀及石油A股，成交統統集中全日高位，收市倒跌，只要今日滬綜指進一步下跌，斷估光証埋數好難輸三兩億咁少。不過無論如何，今日拆倉滬綜指無運行預咗，反而上周五晚，美國退市預期升溫，十年美債息升至兩年高位，三大指數腳軟，近期唔跟外圍股市行的港股，市底有多強？今日是一大考驗。

零售股前景審慎

近期多隻消費股公布中期業績，共通點是同店銷售增長均受制於內地經濟放緩及消費氣氛轉弱。近期唔少消費股的管理層，對下年展望抱審慎態度，其中以服飾及鞋類零售商最明顯。事實上，鞋王百麗（01880）及達芙妮（00210）第二季同店銷售，倒退幅度比市場預期大，有分析指出，今年二線城市未到五月，鞋產品折扣已去到40%甚至50%，比往年打折打得更早，明顯見到零售市道的確比往年弱。

上周五收市後，百貨股百盛（03368）公布半年業績，純利3.25億元，按年倒退38%，期內收入23.14億，升1.96%，但同店銷售卻跌0.7%，接近市場預期下限。管理層維持全年同店銷售2至3%增長的預測，以上半年倒退0.7%，意味下半年要錄得5至6%的同店銷售增幅才可達標。

綜合大行估全年業績跌一成賺7.64億，似乎稍嫌進取，短期有被下調可能，但預測市盈率由○九、一○年25至35倍，去到目前一三年PE大約11至12倍，股價最急勁的跌幅，可能已經在上半年見咗，惟獨對比其他有「轉角」概念的「保底」股份，百盛未免有點食之無味、棄之可惜的感覺。

另一隻走平民路線，主打大潤發大賣場的高鑫零售（06808），上半年賺15.76億元，按年升14.8%，符合市場預期，全年業績要達到大行估計的27.55億元，機會好大，問題反而係接近30倍估值，以及今年比其他零售股跌得少（跌9.4%），未必會係一心博短期反彈的大孖沙嗰杯茶。再者，到目前為止，尚未有一間做傳統零售的內地企業，在電子商貿發展方面能夠開花結果，高鑫準備投資1億，於第四季開始網上生意，儘管相對每年龐大的銷售金額，比例唔高，但係其高估值仍然難免令人卻步。