上周五A股出現世紀烏龍盤，導致中港兩地魚缸大幅波動。其實，錯盤唔係中國獨有，好似一○年五月美股亦曾因烏龍盤而導致道指急挫千點，反映更成熟、更大市值的股票市場，交易系統都可能存在漏動，正所謂「百密一疏」，投資者惟有時刻做好風險管理，冷靜面對突如其來的波動市。

內地4G發牌如箭在弦，利好一眾手機設備股氣氛，TCL通訊走勢對辦可小注。（資料圖片）

今次烏龍盤事件的主角光大証券，今年都算是非多多，早前就因承銷一A股IPO出問題而面臨被罰，又有指其投行部內訌，多名保薦人離職。呢鋪錯盤，可以話係史上最大鑊，難怪揸住光証股權的光大控股（00165）都成為沽售對象，上周五股價一度跌8.9%。睇怕呢系股份仲有排煩，更不排除有高管要孭飛起身，咁多股票好玩，最好暫避風頭。

錯盤事件益軟件股

題外話，由於今次涉及券商交易系統出問題，靈敏度高的缸邊友率先炒作券商軟件更新或升級潮，兩地軟件股起舞，其中金蝶國際（00268）創出新高2.17元，收市升13%、中軟國際（00354）則升6%，咁啱中軟今日公布中績，可以望多兩眼。

下半年唔少手機品牌都密鑼緊鼓推出新產品，加上年底前內地有望發出4G牌照，電訊設備相關股份氣氛有望維持暢旺。TCL電訊（02618）今年次季終於扭轉連續三個季度的虧損局面，錄得3,934萬元純利，上半年合計則蝕2.1億元。上半年，其手機及其他產品總銷量及平均銷售價均有雙位數字升幅，次季毛利率18.4%，較首季的16.4%及去年末季的15.6%為高，原因係公司成功拓展中端智能手機市場，若第三季能保持良好勢頭，全年有望扭轉虧損局面。管理層維持今年營業額按年增25%的目標，以去年營業額120億元計，即今年目標為150億元，上半年已實現營業額為64億元，顯示下半年收入增長將提速。

風險因素方面，由於多家廠商研推新產品，不排除會令部分零件供應短缺，而國際手機品牌擬殺入內地中端智能手機市場，亦會加劇競爭。

走勢上，今年六、七月，其股價先後兩次成功考驗3元水平承接，上周一連升穿10日線（3.52元）及50日線（3.6元），且略為升穿由五月高位延伸的下降軌阻力。若本周走勢對辦，快將現黃金交叉，回吐守3.7元可小注，博再試衝4.3至4.5元阻力區，失守3.52元止蝕。