政府為加快市區重建，喺一○年開始將樓齡五十年或以上舊樓強拍門檻，由最少九成降至最少八成。過去三年多，土地審裁處共收到約68宗唔夠九成業權嘅強拍申請個案，估計可為市場額外提供超過280萬呎市區住宅重建樓面，其中以恒地（00012）涉及嘅重建項目佔最多，料可建接近80萬呎樓面。

過去幾年遞交的不足九成舊樓業權強拍個案，以恒地涉及項目佔最多。圖為該集團的大角咀嘉善街項目。（資料圖片）

受惠降低強拍門檻舊樓部分項目

劉Sir翻查資料，恒地提交嘅強拍重建舊樓項目佔最多，合共有11個，包括大角咀嘉善街、鰂魚涌金馬大廈重建項目，以及何文田勝利道7至7G號等，提供至少近80萬呎樓面，若果以實用面積300呎去計，足足可以起到超過2,600個單位，該批項目中，以大角咀嘉善街規模最大，佔總樓面約莫近18萬呎。

九建最受惠 涉十多幢舊樓

至於最受惠新例嘅發展項目，就係九龍建業（00034）揸住大部分業權，喺紅磡嘅環安街項目。

呢個地盤橫跨區內四條街有成十幾幢舊樓，發展商為咗重建，將項目「斬件」分拆成14宗個案向法庭申請強拍，而大部分個案只係啱啱夠八成業權，若果唔係新例推出，睇怕都好難喺市區搵到咁大個地盤做重建。呢個地盤有成4.3萬呎，總樓面講緊超過36萬呎。

單一項目規模僅次於九建嘅係新世界發展（00017）等擁有大部分業權嘅鰂魚涌吉祥大廈，呢個項目亦都分拆咗做10宗個案入稟法庭強拍，其中6宗個案都係唔夠九成業權，發展商已經批則，可以重建兩幢28層高住宅，提供約近35萬呎樓面。

新地港島區重建矚目

另一個市區矚目舊樓重建地盤，係新地（00016）等界乎筲箕灣道、教堂里及工廠街重建項目，發展商都分拆咗7宗個案申請，其中2宗係引用新例，地盤重建後樓面有約30萬呎。至於全港首宗透過強拍統一業權嘅八成業權個案，係旺角洗衣街78至80號，項目喺一一年九月以底價1.36億元透過公開拍賣售出，並獲准重建一幢26層高商住物業，提供總樓面逾5.6萬呎。