雖然昂納光通信（00877）喺早前發盈警，其後股價並創出五十二周低位1.13元，不過六、七月公司頻頻在市場回購股份，有支持作用，尋日終於成功升穿250線1.79元阻力，即市一度挾到去1.86元，收報1.74元，逆市升近一成，整固後料有力再上，下站阻力上移到2元。

昂納預期截至六月底止六個月將會錄得虧損，原因係收入及毛利率下跌，同埋行政及研發費用上升所致。雖然佢嘅成績表唔多好睇，但估計已經反映喺股價上（今年以來高低位差距54%）。尋日爆上原因，係前晚蘋果公司股價回勇，事關大鱷索羅斯同伊坎加碼投資，帶動電訊設備股跟住升，另昂納啱啱同德國VIS公司合作搞高速光互聯模組，進一步發展新世代光學通訊業務，不妨吼位跟炒一轉。

昂納光通信（00877）

阻力位：2.00元

支持位：1.55元