Fundman睇市：手機零件股 長炒長有

近期內地經濟數據有見底迹象，中資股有番些少鑊氣，但論今年長炒長有必定係網絡股，及受惠中國2G轉3G、3G轉4G的智能手機及零件股。近日盛傳蘋果公司會在九月十日發布新手機，iPhone5C亦在網上瘋傳多時，估計係針對新興市場，尤其係為搶奪中國中低價山寨智能手機市場度身定造，到底iPhone5C個「C」代表乜？Color、Compact定係Cheap，筆者就話係China。睇近日中移（00941）由75元衝上嚟虎虎生威，會唔會係新iPhone終於支援中移TD網？今趟發布會確實令人期待。

講番今年幾隻沾到外國品牌貴氣的本地手機零件股，真係升得好誇張，開始專攻平板及手機OGS觸控屏幕的信利（00732）累積升176%，有份做HTC ONE一體化鋁質機殼的比亞迪電子（00285）升102%，專生產手機用鏡頭的舜宇光學（02382）升66%，幫蘋果iPhone、iPad生產微型喇叭的瑞聲（02018）升40.5%。

瑞聲接力派成績表

舜宇半年收入及純利分別升57.4%及25.7%，至27.8億及1.96億元人民幣，毛利率由19.1%跌到15.8%。舜宇作為OEM及ODM生產商，毛利率係產品競爭力寒暑表，上半年舜宇八成光學產品是500萬像及以下的鏡頭，如果iPhone5C主攻低價市場，可話對舜宇客仔直接挑戰，一三年14至15倍市盈率左右，唔貴，但要上番五月高位，似乎要產品技術有重大突破，如千三萬像素鏡頭出貨比例大升至掂。

今日輪到瑞聲派成績，iPhone5無估計咁好賣，接單量可唔可以被取代，今次應可見真章。金英報告估瑞聲第二季賺5.31億人仔，按年升31%。目前公司大約佔高端智能手機喇叭市場三成分額，議價能力較佳亦令過去毛利率表現相當優異，黑心啲真係有些少想份業績差等股價跌番多少，事關依家個個都睇實蘋果、HTC以及Sony下半年推出的新機，大有機會刺激手機零件股業績及股價，再炒一浸上去。