Fundman睇市：網絡股 估值未見頂

不過，睇埋尋日恒指升269點，收報22,541點，創兩個月高位，且成交亦超過一個月以來最高，真係唔信都唔得。基金經理因為睇淡得太耐，要扭轉投資組合內錢多貨少的情況，惟有狂追內銀，尋日三大藍籌內銀升幅介乎2.2至3.1%，為恒指貢獻95點。

按過往玩法，基金掃完內銀、內險一堆大球場之後，下一輪好大機會會追番落後兼啤打值高嘅中小型股，估計在短期中國經濟可能觸底及中央下半年保增長的意欲增加下，水泥、內房、鋼鐵及大落後的航運股，好有機會成為下一浪基金追逐的對象。

市傳騰訊（00700）準備將微信分拆去星洲上市，但及後公司透過彭博作出否認，唔少賓架認為未來騰訊食粥食飯要睇微信，亦因為咁，個市對微信分拆的消息特別敏感。講開又講，今日股王中期成績面世，大行預測都幾分歧，第二季盈利由最低34.76億（人民幣．下同）到47.5億都有人估，相當於按年增長介乎11.7%至52.7%，平均數41.35億，升32.9%，以現價370港元計，一三年預期市盈率30.4倍。

一四年是微信與舊有業務收入的交接期，騰訊盈利增幅好有機會由過去兩年的2字頭跌落1字頭，仲值唔值咁貴，見仁見智，但依家買網股講基本因素實會畀人笑，皆因個個只係睇實第四季上市的阿里巴巴，幾間外資行放風的估值一如海鮮價，估計在正式定價前，成個網絡行業的估值，仍可繼續癲完再癲。

華晨（01114）公布半年業績，純利20.29億元，按年升52.3%，管理層透露年底實現年產30萬輛的目標問題唔大，明年目標銷售額則維持30%增長。由於半年業績差不多已等於大行預測一三年全年的六成五，故業績後被重估機會唔細，尋日股價升1.3%報10.66元（港元．下同），看來升勢無咁短癮。

中國遠洋破位跟進

五、六月中央打假下，內地出口數字差到離譜，六月更加出現負數，但亦因為咁，令上星期公布七月份出口回復5.1%增長的消息，寧捨令市場振奮。其實睇番五月至八月初期間，唔少航運類股份不單止無破底，部分仲企穩兼造埋圓底出嚟，當中包括中海發展（01138）、中海集運（02866）、中外運（00598）、中國遠洋（01919）及中遠太平洋（01199）都有咁嘅情況。好消息唔升，或者有圍外人唔知的毛病，不過壞消息唔跌，就可能意味負面因素已充分反映在賤過地底泥的估值身上。

中遠七月底出盈警，預告上半年要蝕7.3億至14.6億人仔，但股價不跌反升，話就話比一二年上半年狂蝕49億人仔好些少，但仲係低過市場預期一截，不過既然個市炒中國經濟復甦，遲早都輪到航運股，睇四月開始幾次反彈都受阻於250日線，尋日抽上3.55元，同阻力3.59元只係一步之遙，雖然揸貨可免則免，但如果破位，亦不妨搭番轉順風車。