樓市出更：短炒無癮摸貨幾絕迹

美聯韋文俊（左）表示，原本受內地客追捧的西北九龍交投驟降，但預期高鐵完工，將有助刺激區內樓市氣氛。

政府舊年推出加強版遏炒措施，即時令炒家絕迹。地產代理數據顯示，重稅下住宅摸售登記每況愈下，今年首七個月每月摸貨全部少於5宗，而七月份就只得一宗遠期樓花摸貨成交，業主帳面要蝕近300萬元。

住宅摸貨登記銳減

利嘉閣研究部主管周滿傑話，上個月只得1宗住宅摸售登記，同六月份一樣，佔期內整體二手買賣比例得番0.02%，預期未來幾個月摸貨活動將會絕迹市場。

內地客無晒用家窒步

劉Sir喺土地註冊處睇到，七月份嗰宗摸貨登記係灣仔尚匯一個低層單位，登記成交價約1,488萬元，對比一一年買入價約1,774萬元，低出約286萬元，虧蝕幅度約16.1%。

辣招唔單止令炒家冇晒，連內地客同用家都唔敢貿貿然入市。美聯西北九龍區董事韋文俊話，舊年十月推出買家印花稅，令到原本好多內地客嘅西北九龍區二手交投突然靜晒，今年首七個月，區內（不包括荔枝角美孚新邨）嘅二手住宅買賣登記只得約3,804宗，比舊年同期5,373宗，下跌達29.2%。而一手住宅登記更加下跌七成，只得約562宗。

九龍站內地買家比例一向高企，但要畀買家雙倍印花稅，分分鐘要畀多樓價23.5%先可入市，所以內地客突然間消失。若果同一○年首七個月出招前相比，九龍站一帶屋苑曾經錄到476宗買賣登記，今年登記量更加下跌約81.5%。