七月九日先至上市嘅中國擎天軟件(01297),雖然曾經跌穿過招股價1.45元,但自從交咗第一份靚仔嘅成績表後,股價就係咁破頂,除突破上月推介時定的阻力位1.8元外,上周五一度挾到去1.98元上市新高,埋單仍升7.9%,收報1.91元,已經連續三日收喺保力加通道頂部1.77元樓上,14日RSI未算超買,睇嚟兩蚊關指日可待。

啱啱上市滿月嘅擎天,如果以高位1.98元計,一手最多賺1,060元,表現標青。公司因出口企業對退稅軟件服務需求增加,今年上半年收入增長47.5%至1.04億元人仔,純利增長1.96倍至3,022萬元人仔,毛利率亦由50.8%大增至67.1%。查實佢曾經係倫敦AIM第一隻中國軟件股,○六年上市,一○年私有化,皆因估值過低、熱潮減退,直到今年引入阿里巴巴集團轉戰香港,而上周三景順亦都加注,相信值得跟進,畏高的話可以等到回調到1.77元後收集。

中國擎天軟件(01297)

阻力位:2.20元

支持位:1.51元