新蒲崗景福街與Mikiki商場僅一街之隔，舖位升值潛力被投資者看好。

期待已久嘅啟德郵輪碼頭終於開幕，東九龍新蒲崗景福街一帶舖位已成為「炒家樂園」，原因係該地段正對住新地嘅Mikiki商場，亦係郵輪旅客上落必經之地，所以有投資者早排已經即睇即購該街道一個單號連租約地舖，涉額約2,400萬元，呎價超過3.4萬元，創該區地舖呎價新高。睇真啲上址收租回報率低至約1.7厘，估計新買家咁快扑錘買，都係睇好個舖嘅升值潛力，唔諗依家收緊幾錢租。

新蒲崗景福街與Mikiki商場僅一街之隔，舖位升值潛力被投資者看好。

市民心聲
金滙地產周濼生表示，景福街地舖業主十分惜售，市場暫只有零星買賣放盤。

在景福街開設士多的黃先生預期，啟德郵輪碼頭長遠會帶旺新蒲崗零售氣氛。

新蒲崗景福街地舖買賣個案

啟德郵輪碼頭喺今年六月中正式啟用，嚟緊仲有更多郵輪帶嚟更多唔同國家旅客前來之餘，亦吸引承租能力較強商戶進駐該區，地舖售價自然受惠上升。而咁多區之中，新蒲崗最接近碼頭，而景福街同埋Mikiki商場只係一街之隔，難怪唔少投資者已吼實。

回報低 投資者博價升

有代理同劉Sir講，兩、三年前嘅景福街地舖，租戶唔少仲係建材及五金等呢類小本經營商店，依家條街約30個地舖中，經營餐廳同埋粉麵等店舖已超過10間，佔成條街地舖數目約三分之一，另多間大型地產代理行加埋「地膽」地產代理行就共近10間。

區內地產代理金滙地產，其助理分行經理（工商舖）周濼生（Can）話，依家景福街確實有唔少新租戶，但租金升幅唔算明顯，以一個近千呎地舖計，月租都只係維持約兩、三萬，租金回報偏低。不過，投資者反而睇好條街嘅地舖升值潛力，好似區內一個單號地舖，餐廳依家每月近3.6萬元租緊，雖然收租回報只得1.7厘，但投資者認為售價有得升，故即拍板以約2,400萬元買入，呎價逾3.4萬元，係區內地舖呎價新高，而物業約八年就升值逾3.4倍。

Can仲話，條街地舖租金回報雖然低，但投資者有貨照掃，先排有個單號地舖以約1,800萬元連約賣咗，呎價約2.57萬元，收租回報率兩厘唔夠。

食肆舖半年反價21%

依家該街道地舖買賣放盤唔多，其中有個依家由連鎖餐廳租用嘅單號地舖，半年間反價逾21%，最新叫價約3,900萬元，若以意向價賣，呎價近4萬元，將再創區內新高。