雖然電煤價格短期未必可以回升，不過由於處於低位，故進一步下跌的風險不高。（資料圖片）

港股連插兩日後，昨反彈67點，表現未算滿意，皆因中國外貿數據理想，加上預期美股回升，但港股依然彈唔起，升市主板成交卻縮至427億元，期指成交亦僅5萬張左右，八月市況投資者仍乏信心，升市冇人追，跌市冇人撈。

雖然電煤價格短期未必可以回升，不過由於處於低位，故進一步下跌的風險不高。（資料圖片）

阿莊100萬元投資組合

全球最強勢之美股三連跌已經少見，所以市場預期可止跌回升，是耶非耶瞓醒覺即有分曉。美股近期靠聯儲局官員出口術操縱，當升到咁上下即暗示退市，同樣地當出現後勁不繼就話冇咁快退市。呢兩招已玩得太耐，好似日本瘋狂印鈔得段虛火，近期經濟數據打回原形，日圓昨曾升至96邊。

飛機股內傷未愈

內地公布七月外貿數據之後，曾對港股有段短暫推動力，尤其係碼頭股，但A股最終仍要微跌收市。今日輪到公布通脹，市場預期升2.8%逼近警戒線，內地雨災完又旱災，食品價格好難回落，加上今年樓價上升亦會帶動租金。每逢通脹重臨，人仔就跟住升值，所以人仔連日再創新高，但限制三公消費，飛機股仍係超弱板塊，中期業績將至，經過首季業績大跌眼鏡之後，要買都不妨等多陣。

昨日有段小插曲，聯通（00762）三點三突然抽高，幾分鐘內急升4%，竟然係業績提早洩漏。收市後公布上半年多賺55%勝預期，但iPhone效應漸失，加上4G時代將被中移（00941）搶回優勢，如後市未能衝破11.68元或形成雙頂。

滙控（00005）昨回穩，但走勢最突出的可算煤炭股，在普遍看淡的業績前夕可算爆冷。其實焦煤價格上星期已見異動，原因是基建、房屋及鐵路建設帶動鋼鐵價格及需求上揚，焦煤及鐵礦石亦同時跟隨，永暉焦煤（01733）與恒鼎（01393）昨分別急升19%及5.6%。

三大煤企做好，預告中期大幅虧損23.5億元人仔之兗煤（01171）升4.3%，有消息指電煤亦醞釀加價，但查實直至上星期煤價仍未止跌，稍為利好消息係六大沿海電廠庫存日數由19日降至17日，近日內地「火爐」氣溫無疑將推高用電量。煤價愈墮落電企愈快樂，但有分析指電企現在已不想煤價再跌，因為電價亦隨時有下調壓力；地方政府為扶持當地工業，不少已向中央申減電費；因此電企無謂賺到盡，煤價在現時低位徘徊反而賺得開心兼低風險。所以即使未必可回升，但卻可以炒「見底」，最穩陣仍係神華（01088），因有三成收入屬發電業務可拉上補下。