金鐘遠東金融中心有中層單位，以每方呎約40元租出，創該廈約三年呎租新低。（資料圖片）

外圍經濟唔明朗，對甲級商廈租務影響最大。金鐘近排接連有幾宗寫字樓低租個案爆出，啱啱有老友話，遠東金融中心有個中層側海景單位，吉咗半年後，業主終面對現實降低叫租約27%租出，計起上嚟呎租只係約40元，創該廈約三年呎租新低，而月租都只近12萬元。

金鐘遠東金融中心有中層單位，以每方呎約40元租出，創該廈約三年呎租新低。（資料圖片）

近期金鐘甲級商廈呎租低價個案

代理老友同劉Sir講，上個月成個金鐘甲級商廈租務成交10宗都無，放租嘅業主愈來愈心急，惟有減租吸客，好似上述遠東金融中心中層單位，面積近3,000方呎，之前每方呎租金近50元，租客今年初約滿搬出後，業主每方呎新租金嗌約55元。

低價購入 回報守6厘

不過，近幾個月，商廈市場連租務市況都愈來愈差，業主最終肯調低意向租金，以每月近12萬元將單位租出，呎租只約40元，新租客係中資公司。由於個單位係業主約十年前買入，涉資只近2,300萬元，所以收租回報率仍高約6厘。

鄰近嘅灣仔區，一線商廈租金現時尚算企穩，好似會展廣場辦公大樓有個低層園景單位，日前以每月14萬多元租出，呎租約51元，屬市價水平。反而，同區乙級商廈特色單位，就有價有市，中原（工商舖）徐志聰話，灣仔謝斐道港佳商業大廈有個高層連平台寫字樓單位，啱啱以約345萬元賣咗，若果扣除平台面積計，呎價達約1.17萬元，創該廈呎價新高。

新文華舖賣近二億

尖東大樓面商舖一向缺盤，所以一有靚盤放賣，承接力都唔錯。美聯旺舖林雍坤話，投資者蔡伯能舊年以逾4億元，向九龍建業（00034）買入嘅新文華中心2樓全層，其中該層交吉嘅A1及A2號舖以近2億元賣咗，呎價約1.18萬元，比起入貨價平均每方呎近7,500元，期內升值逾57%。

另劉Sir收到英國皇家特許測量師學會（RICS）第二季度全球商用物業調查，RICS租戶市場情緒指數喺上季有上升，普遍受訪者都預期本季租金仲有得升。