SUN勢力：中糧短期睇高一線

滙豐控股（00005）業績唔及預期，港股尋日立即冧檔，一路頂到實10日線失守，手痕友短期只適宜搵番業績肯定無衰，最好發埋盈喜份成績表有保障的一類。

今個月二十八日出成績表的中糧（00606），盈喜預告上半年盈利升三成，公司主營業務油籽加工，儘管行業競爭情況，上半年無大改善，但人民幣升值，匯兌收益紓緩業績壓力。而公司採用了套期保值業務模式，也發揮到防險及鎖定利潤作用，是上半年業績改善之關鍵。展望下半年油籽加工業務毛利，可望維持較高水平。至於大米業務，採取直購模式，省過採購環節的好處，也應在今年業績中浮現，毛利率料回升，有助相關生意盡早止血。

去年，是中糧的轉捩點，盈利大跌近四成八，油籽及大米業績重整之後，今年料有改善，較保守估計全年賺16億升31%，一三年PE只係11.5倍，近期股價在3.55至3.7元之間橫行，中線應已見底，今明年業績向好，短期睇高一線。