沙田第一城有單位獲銀行調升估價約3%，已屬大變幅。(資料圖片)

二手私人住宅交投顯著放緩，樓價難有指標，搞到銀行估價無晒方向，未有大幅調整主要屋苑估價，普遍維持上月水平，就算有個別單位估價出現變動，上落幅度都係講緊約3%。沙田第一城高層單位，恒生銀行（00011）調升單位估價約3%至約511萬元，已經係變幅最大單位。

沙田第一城有單位獲銀行調升估價約3%，已屬大變幅。(資料圖片)

本月部分二手屋苑最新銀行估價

劉Sir睇過幾間銀行嘅網上估價數據，成交疏落下，估價取態「一動不如一靜」。好似恒生銀行咁，對鰂魚涌康怡花園、鴨脷洲海怡半島及天水圍嘉湖山莊等屋苑。估價都按月不作調整。

大屋苑多數價唔「郁」

不過，都有個別單位獲該銀行調升估價，上述沙田第一城高層單位，本月最新網上估價約511萬元，較上月錄得嘅496萬元上升約3%；又好似鰂魚涌太古城一個低層單位，亦獲該銀行調升估價約3%至約716萬元，雖然兩伙估價都只係調升咗約3%，但已經係變幅最大嘅單位。

滙豐銀行今個月估價就比較「迷失」，除咗維持沙田第一城、將軍澳新都城等屋苑估價不變外，亦有調升及調減部分屋苑單位估價，僅由約0.8%至2%不等。中銀香港（02388）更維持大部分單位估價按月不變，只略為調升荔枝角美孚新邨以及海怡半島估價，幅度只約2%水平。

昇悅連減五口價沽

二手市方面，唔少業主睇後市比銀行悲觀。利嘉閣鄧俊文話，長沙灣昇悅居7座高層H室，建築/實用面積643/490方呎，連減五口共約38萬，以560萬元沽，建築/實用呎價8,709/11,429元，低市價5%；同座一個極低層單位，六月售價都要562萬元，而是次售價比大型銀行估價亦低咗約12%。

消息話，鰂魚涌南豐新邨4座極低層兩房售約432萬元，建築/實用呎價約9,114/11,049元，屬同類近期新低。祥益蕭嘉偉稱，天水圍嘉湖山莊美湖居低層相連單位減42萬元後，獲買家以約618萬元購入，較同類跌價約6.36%。