澳元兌美元走勢

匯市已經成為「央行市」，升跌視乎央行取態，聯儲局勢將成為首家退市嘅央行係眾所周知，惟短線未退得住就令美元有壓力；澳洲央行由四月開始表態行弱澳元、減息等言論充斥，亦成為澳元彈極都唔起嘅原因，短線支持在0.8850。

澳元兌美元走勢

歐洲央行雖然講咗好耐「減息、負利率」等，但一直只聞樓梯響，要知道歐洲雖然度過危險期，但仍要歐央行維持寬鬆環境吊命，雖然央行口口聲聲再出招，不過減息同負利率未必得到德國支持，而前年底推出的長期再融資操作（LTRO）反應冷淡，前車可鑑下，筆者反而認為依家一眾「絕對唔退市」嘅央行行長例如德拉吉同史蒂文斯，可能都係出口術擺空城計，推低歐元及澳元以便不費一兵一卒就收到預期效果，其實根本都唔打算再進一步量寬。

不過，美國退市，美國債息上升，令歐洲債息亦被迫扯高，會令歐洲面臨大衝擊。然而，歐洲經濟無起色亦非美國樂意見到，到時拖累美國復甦，聯儲局退市大計亦可能被拖延，因此環球央行都樂意見到經濟一起回穩，才慢慢令政策回歸正常化。事情係咪如筆者預計，惟有拭目以待，不過大方向美元強勢其實未變，一眾外幣短線上升，但已不建議高追。