近年熱衷在奧運站一帶入市的溫州客，近期減價售出海桃灣單位。(資料圖片)

二手樓有價無市，要走貨真係要肯減價，部分要套現嘅內地業主，亦深明此道，唔賺錢都要走貨，好似有傳幾年前喺奧運站入貨嘅溫州客，啱啱以909萬減價賣咗間海桃灣單位，件貨揸咗三年幾，連埋使費都只係平手，呢個盤好少成交會無錢賺，係市場罕見。另外，天后栢景臺有單位業主亦減價470萬元出貨，成交價只係2,330萬元，低市價20%。

近年熱衷在奧運站一帶入市的溫州客，近期減價售出海桃灣單位。(資料圖片)

二手樓減價出貨實錄

劉Sir收到風，前幾年喺奧運站入貨嘅溫州客，近排頻頻出貨，消息透露，海桃灣2座高層D室，建築/實用面積838/611方呎，減咗41萬賣909萬元，建築/實用呎價約10,847/14,877元，比二○一○年購入價約850萬元，帳面都賺約59萬元，但扣埋開支估計只係平手。

其實同一批溫州客揸住另一間西南九龍帝峯．皇殿2座高層單位，早排都減咗二百幾萬賣1,338萬元，三年都只係升值約16%。

御龍山低3%平手走

美聯陳國良又話，沙田御龍山5座中層A室，賣咗約992.88萬元，實用呎價約1.28萬元，低市價約3%，五年帳面先賺約23萬元，扣埋開支都係平手。

近排班業主出貨都要劈價，中原陳家鴻話，栢景臺1座高層海景B室，今年二月業主見同類單位賣到成2,950萬元，即以2,800萬元放盤，近日要減到2,330萬元先賣得出，累減470萬元，低市價兩成，建築/實用呎價約1.83萬/2.33萬元。

太古城建呎九千六

該行又爆料，沙田廣場B座中層4室，四月賣644.4萬元，但後尾買家撻訂，買家蝕成78萬元，近期減至628萬元賣多轉；世紀21北山話，北角富澤軒低層B室，成交價398萬元，四百萬元有找，實用呎價11,881元，低市價10%。

另外，美聯補充，鰂魚涌太古城太湖閣中層A室，屬於屋苑一期入場版單位，剛以652.5萬元獲買家承接，建築呎價9,624元。