股海實戰：恒指上衝動力減

近日同地產界老友聚餐，聽佢講某城中富豪對本地樓市睇法頗為悲觀，認為行業嘅黃金時期已過，未來樓市好難搵食。事實上，今年上半年發展商售樓數量遜預期，第三季亦未見有大起色，下月又到業績期，已有多家大行率先動手下調地產股盈利預測，但慶幸以目前地產股嘅財政實力普遍維持良好，相信不大影響派息。

總括一句，以目前嘅估值水平，地產股尤如「雞肋」，食之無味，棄之亦可惜。從另一角度睇，若然佔恒指一定比重嘅內銀同地產股都缺乏大升動力，指數上衝嘅動力必受限制，呢一點投資者不可不察。

呢期最威嘅藍籌股係騰訊（00700），現價一三年度預測市盈率約30倍，若然阿里巴巴集團真係如傳言所講要以天價（即市盈率40倍）上市，騰訊作為「首席影子股」要炒到上咁上下估值水平，大概要見430元左右！但當然呢個只係簡單假設並不能作準，且上周五騰訊股價急升，短線技術上已呈超買，冇貨喺手不宜冒進。

又到咗企業業績期，唔少公司發盈警或盈喜，上周五中糧控股（00606）發盈喜，預計今年上半年業績將錄得顯著增長，純利將較去年同期顯著增長約三成，期間主營嘅油籽加工業務仍受壓，主要係靠人仔升值帶來匯兌收益尤如「及時雨」，加上套期保值業務亦發揮防範風險鎖定利潤嘅作用。

中糧盈喜助叩關

翻查資料，公司去年中期賺5億元，全年則賺12.2億元。若然今年中期純利增長約三成，即6億多元，咁即係話同去年下半年差唔多。以上周五收市價3.63元計算，往績市盈率12倍，業績回穩下現價估值料具支持，短線若能守穩3.5元樓上水平，有勢上試阻力位250日線4元關。

順帶一提，新環保能源（03989）上周五公布，官方批覆變更旗下一項目嘅營運條款，料對公司經營情況同財務狀況造成重大正面影響，阿莊選擇再坐一會。若本周市況有變要減倉，會考慮沽出滬杭甬（00576）。