英皇鐘錶珠寶於中港城的旗艦店正進行裝修工程。
歐美經濟數據時好時壞，相比之下，大中華就好好多，所以唔少國際時裝店同埋珠寶鐘錶店都冇停過喺香港一線街開舖，而尖沙咀廣東道更係「兵家必爭之地」。其中英皇鐘錶珠寶（00887）早前預租嘅中港城地下及高層地下4至6號店舖，將會打造成集團其中一間旗艦店，依家正做緊裝修工程，可望趕喺今年十．一長假期間開幕，到時將會係該集團喺呢段街嘅第5間分店，擺明對該地段零售前景充滿信心。
遊客心聲
許小姐：廣東道鄰近中港碼頭，對廣東旅客最為方便。
港人心聲
林先生：雖然廣東道名店吸引高消費客人購物，但對香港經濟都有幫助。
尖沙咀廣東道地舖矚目租賃
地舖呎租高見千七元
該段街地舖數目約莫60間，時裝、手袋同皮鞋等店舖加埋約30多間，佔超過一半，而鐘錶珠寶金行數目都唔少，都有約10間。個代理仲話，該段廣東道地舖月租閒閒地數百萬至過千萬元，金額拍得住銅鑼灣羅素街地舖租金，依家每呎租金都去到約1,700元。
對於有啲人話內地豪客少咗嚟香港掃奢侈品，大大打擊核心消費區零售氣氛，英皇國際（00163）執行董事張炳強話，內地旅客消費摸式唔係季季都一樣，香港賣嘅鐘錶珠寶款式較多，有唔少捧場客，所以長遠對一線街高消費銷售前景有信心。
英皇鐘錶進駐中港城
而英皇集團投資者關係部總監陸文靜話，英皇鐘錶珠寶預租嘅中港城地下及高層地下4至6號舖，希望可以趕喺十．一長假期嗰陣開幕。該兩層舖面積加埋大約1.5萬方呎，內部設計詳情就要保密。有代理話，上址喺一一年預租，月租約350萬元，平均呎租約233元。
近年廣東道國際品牌雲集，嚟自廣州嘅許小姐話，「呢段街地舖賣嘅高價鐘錶及化妝品款式好齊全，加上好近中港碼頭，對廣東嘅旅客最為方便。」
| 租／售 | 租 售 |  |
| 樓盤由squarefoot.com.hk提供 | ||
