繼六月阿爺話過要「保在建」後，近排係咁傳出利好板塊消息，如內地今年鐵路投資有望超額完成、投融資體制改革方案或於年底出台、鐵路總局千五億元人仔債券獲批等，本周一眾鐵路基建股成功突圍，留意到隻中國交通建設（01800）半年股價唔見咗一截，高低位差距37%，啱啱出現短線黃金交叉利好，尋日回補七月三日的下跌裂口5.8至6元，以接近全日高位6.06元收市，升逾2%，可以冷敲。

中交建首季多賺17.4%至17.9億元人仔。除成績表靚仔外，查實佢手頭工程都唔少，包括本月中標的湖北宜昌高速公路項目，涉及金額10.75億元人仔，同埋合共23.21億元人仔的內蒙古呼和浩特、廣西梧州及四川成都三個項目。睇番幅圖，股價自五月起沿住10日線下跌，近日重返10日及20日線樓上，技術走勢轉好，阻力上移到6.56元。

中交建（01800）

阻力位：6.56元

支持位：5.50元