太陽日誌

港府公布六月份綜合消費物價指數，即係大家叫的「通脹」，比一年前升4.1%，高過五月的3.9%，就算剔除政府一次性紓困措施，都見4%。就算你可以唔食煙唔飲酒（升2%），唔搭車（升2%），都係避無可避的，事關電力、燃氣及水升6.7%，住屋開支升6.3%，非出外用膳的食品開支升4.3%。

太陽日誌

綜合大行對中鐵建之預測（人民幣）

唔知到看官睇住4%通脹有乜感覺，相信唔少打工仔，過去一年收入未必有4%增長。若閣下並非「月光族」，若於滙豐銀行有超過一百萬元大額定期存款，一年利息0.2厘，換句話揸住一百萬唔洗，存入銀行，一年之後購買力唔見咗三萬八，存錢入銀行等於個個月貶值三千幾，都咪話唔恐怖。

筆者身邊一班精於投資的老友，最近都叫晒救命，尤其五月聯儲局話要作好退市部署後，債券漫長牛市有迹象告一段落，於五、六月急跌，唔少債券基金上半年累積升幅經已跌番出去，去私人銀行開戶，借平錢炒高息債的熱潮近日明顯冷卻，高息股亦變得一池死水。另外，傳統港人鍾情買磚頭收租抗通脹，也因政府連番出辣招，SSD、DSD令買樓成本急升，收租回報期變得更長，再唔划算。

港股更不消提，中港經濟進一步「融合」加埋恒指愈來愈有中國色彩，港股同A股一樣終日望天打卦，等中央政府政策打救。最近收到唔少大型地產中介公司的宣傳電郵，集中推銷美國物業，主打係租務回報閒閒哋有7厘以上，部分中部地區更達雙位數字，但要去一個「萬稅」國家隔山買牛，真係唔敢亂向大家介紹，總之今時今日要為這至少4%回報打拚，認真唔容易。

講番個市，前日報復式勁升近五百點後，A股因為滙豐中國的七月份PMI跌到47.7，創十一個月新低而腳軟，港股卻係依然故我，昨再升53點報21,968點，七月期指由上個月轉倉高峰的20,200至20,400點，挾到昨日高位21,995點。儘管有千幾點在手，好友大戶看來仲係得勢不饒人，結算前要殺到盡。

家電股終見死貓彈

中資行揣測，李總的「保七」主題，包括「擴大消費」及「增加投資」，兩隻自六月開始無補貼支持的家電股，終見死貓彈，TCL多媒體（01070）及創維數碼（00751）分別升10.1%及7.1%。

中央要緩解水泥、鋼鐵嚴重產能過剩，唔走回頭路去大搞基建及鐵路真係無乜可能。內地媒體話鐵路投融資體制改革方案，會在九月底上報國務院，今年年底前出台。孰真孰假？無人知，但鐵路股愈升愈有，中國鐵建（01186）、中國中鐵（00390）、中國南車（01766）及南車時代（03898）分別升2.4%、3.4%、2.1%及4.3%，月中低位至今，四股累積升幅達34.5%、34%、28%及42.4%，真係發市當三年。

以中鐵建為例，今年預期市盈率彈番上8.3倍，以未來三年平均一成左右的增長，估值仲算合理，消息配合短期再升一至一成五升幅未嘗不可，但睇落最大一隻雞可能已經在過去三星期走咗。