股海實戰：華創優勢未盡顯現
滙豐中國製造業PMI七月份數據遜預期，引發A股回吐，港股昨亦曾跟隨回落逾百點，惟最終倒升53點收場。其實市場已一定大程度消化九月美國可能退市及次季以來內地經濟增長放緩嘅負面消息，嚟緊只要中央真係出招，咁A股唔升得多都唔使睇得太過差，港股喺現水平再上幾百點亦冇咩大不了，料大方向出現前波幅不離21,000至22,500點水平。
在華潤系中，華創是相對具備優勢的一員，透過同系協同效益及提升管理效率，未來仍有好大發展空間。（資料圖片）
阿莊100萬元投資組合
新能源股繼續舞高，早前提及嘅電池股係威係勢，天能動力（00819）及超威動力（00951）分別升7%及10%。尋日提及銀河證券（06881）及新環保能源（03989），考慮到要維持一定現金量，遂沽出中銀香港（02388）一萬股，再換入三萬股銀證，另跟進新環保能源（03989）20萬股。
炒股仔要量力而為
除節能環保領域外，下半年國策重點扶持嘅係資訊科技業。尋日傳來奇虎360擬斥近16億元洽購A8電媒（00800），刺激A8電煤股價急飆兩成。想博細價股，近日獲騰訊及劉央增持嘅文化中國傳播（01060）可留意。惟要補充一句，呢啲股仔好蝦人炒，上車容易落車難，冇人知幾時先至大炒，沾手宜注意風險，量力而為。
華潤電力（00836）及華潤燃氣（01193）嘅合併建議失敗，此前傳出內地官媒旗下記者實名舉報華潤集團舵手涉貪，時間來得巧合，但外人實在難評誰是誰非。站喺投資嘅角度，紅籌股有史以來，每次出現涉及系內高層嘅問題，最終都係以換人平息，上市公司影響只係短暫性，唔排除今次事件亦不例外，故不妨以「亦危亦機」來看待系內五股。
華潤系五股中，華創（00291）、潤地（01109）及潤電已成藍籌股，潤燃亦曾有染藍計劃，惜據聞業務發展遇上難題，故始有與潤電合併嘅計劃，如今併唔成，潤燃日後發展有待觀察。潤地同潤泥（01313）分別做房地產同建材，算係半個同業。揀水泥股潤泥也許不及安徽海螺（00914）；潤地算係內房龍頭，但現價估值未見特別吸引。
最後係華創，應該係相對具備優勢嘅一員，雖然近年核心零售及啤酒業務受內地市道轉弱及同業競爭激烈所影響，但透過同系協同效益及提升管理效率，未來仍有好大嘅發展空間，若參照香港地主股旗下樓盤起到邊同系零售連鎖店就開到邊嘅發展模式，華創優勢未盡顯現，若股價再現大波動，可留意中長線收集機會。
