荃灣TML廣場單位大部分面積逾千方呎，並坐擁海景。

荃灣近幾年有好多新型工廈落成，其中以海盛路的TML廣場「巨無霸」工廈規模最大，現時已有過百放租單位，部分意向呎租低至約13元，接近同區樓齡十多年嘅工廈，對租金造成下調壓力。

荃灣TML廣場單位大部分面積逾千方呎，並坐擁海景。

荃灣TML廣場大批租盤對同區工廈影響

有代理指出，荃灣匯力工業中心有業主趁租盤傾巢而出前，決定劈租逾16%，並快快手同現租客續租。但亦有租客貪新忘舊，皇廷廣場有個貿易公司租客就轉租TML廣場，月租同依家差唔多，但係新址有全海景。

美聯工商區域營業董事李麗嫦同劉Sir講，預計最快呢個月底入伙嘅海盛路3號TML廣場，大部分單位面積過千方呎，依家透過代理放租單位已超過百個，意向呎租約13至15元，同現時區內樓齡十多年嘅工廈呎租約10至13元相比，構成搶客威脅。

此外，至於海盛路11號的ONE MIDTOWN工廈，喺舊年第四季入伙，呎租只係介乎約12至13元。

貿易商貪「新」或轉場

聽區內代理老友話，荃灣工廈樓齡好參差，有啲舊到三十至四十幾年，每呎租金低至6、7元，租戶以倉儲及五金加工等為主，佢哋轉租新工廈意欲不高。

反而，有啲樓齡二十年唔夠嘅工廈，租戶好多都係中港貿易公司同廣告公司等，呢啲公司肯試新嘢，轉租嘅機會較大，所以業主惟有減租留客。

TML呎租嗌13元撬客

以沙咀道26至38號匯力工業中心為例，有個低層單位，由貿易公司租客租緊，依家月租約9,600元，呎租約12元，業主早排主動每呎減租兩元，新續租租金約8,000元，呎租10元，減幅逾16%。

另一方面，由於TML廣場單位有海景，代理話，該大廈有低層坐擁海景單位，業主意向月租近1.6萬元，呎租約13元，上個星期獲同區沙咀道52A號皇廷廣場一個貿易公司租客洽租。由於新單位面積同租金開支與依家差唔多，因此個租客等到租期响今年底屆滿之後，就決定轉租。