恆指期貨走勢2013/7/23

上周港股窄幅波動，市場引伸波幅回落，照道理，大戶為衍生工具及手上現貨進行對沖的誘因亦相對較細，奇怪係七月期指未平倉合約，卻增加近5,000張。筆者曾提出，慎防結算前嚟一次單邊挾倉，可惜筆者未有把握機會，做個「束勒式」組合，平白錯過昨日挾淡倉。

恆指期貨走勢2013/7/23

美匯指數偏軟，昨日亞洲股市氣氛唔錯，加埋傳中央訂7%為經濟增長下限，刺激A股做好，大市高開100點後，幾乎由頭升到尾，午後最多升547點，收市報21,915點，有498點進帳，最重要係主板成交大增逾七成至664億元，即月期指最高見21,981點，收報21,894點，低水21點，成交8.59萬張。

昨日現貨開21,517點，基本上已突破21,205至21,522點橫行區，而高位21,964點，觸及0.618反彈阻力21,951點，加上小時圖上恒指頗超買，相信需要時間消化，破50日線之後，21,621點倒過來成為支持，或者錯過昨日機會，又想開八月好倉，可以等指數回吐到目標才入市。