新環保能源過去兩年積極拓展廢物處理業務，近月更擬收購一家廢車家電回收商。(資料圖片)

恒指尋日大挾淡倉，一度逼近22,000點關，收市恒指及國指分別升2.3%及3.8%，主板成交回升至664億元，主要受A股升勢帶動，有指係受惠於李總理落實「保七」底線；又話內地金融機構新增外匯佔款年內首次出現負增長，令市場憧憬人行可能會下調RRR；另有指基金次季持倉比例已降至一○年第三季以來最低水平，反映再大幅減倉嘅風險已降。

新環保能源過去兩年積極拓展廢物處理業務，近月更擬收購一家廢車家電回收商。(資料圖片)

前日提及嘅中興（00763）尋日復牌，開市價12.18元，全日高位見13.96元，收報13.84元，升幅19.5%。除咗落實A股股權激勵計劃外，公司次季業績理想亦利好股價表現。好在阿莊尋朝晨咁早上車，短線上到14元邊或樓上可先走一轉。另外，尋日話買嘅龍源（00916）亦順利行事。

銀證小注博返水面

中信証券（06030）及海通證券（06837）升逾半成。有指A股IPO月底開閘無望，令A股沽壓暫緩，有利券商，但阿莊反而認為，A股IPO重啟始能恢復應有嘅融資功能。既然兩隻龍頭股唔肯回，若氣氛持續向好，可轉睇晒士較細嘅銀河證券（06881），4.8至4.9元小注，首站博佢重上水面（招股價5.3元）。

順應國策睇吓領導人讚不絕口嘅「變廢為寶」股份，尋日升幅榜就有隻新環保能源（03989），本身係彤叔系，後來引入北京首創，並透過三月包銷供股，成為單一最大股東，穩操控制性股權。過去兩年公司默默耕耘，積極拓展廢物處理技術及服務，已取得西班牙及德國嘅處理廢物分選及壓氧消化技術，年報披露截至去年底已擁有八個廢物處理項目，投資額22億元，設計規模年廢物處理量約兩百萬噸，每年可產生上網電量約3.77億千瓦時，睇落確係想有一番作為。

去年公司業務尚未成熟，部分項目尚在建設中，故仍然虧損，宜留意嚟緊中績。呢隻股雖然細價，但中資股東背景具實力，若業務發展交到成績，唔難引基金落場，股價有條件突圍，可留意。