上環信德中心西翼。

雙倍印花稅出籠已五個月，工商舖買賣仍無起色，有唔少業主放盤劈價幅度加大到約20%，較出招初期多咗約10個百分點，而雙倍印花稅率最高都只係8.5%，所以都幾吸引，難怪唔少投資者已開始入市「撈底」。

上環信德中心西翼。

紀惠廖偉麟稱，上月購入上環信德中心西翼中層單位，涉資逾億元。(資料圖片)

近期投資者「撈底」情況

紀惠集團廖偉麟（Jeffery）認為，商廈樓價已跌至十分吸引水平，並透露現正趁低洽購幾單商用物業，料投資額高近15億元。

信德西翼低25%成交

Jeffery同劉Sir講，港島甲級商廈未來新供應唔多，依家區內靚嘅商廈，呎價只係約1.8萬起，真係好「低水」，所以上月底趁低買咗上環信德中心西翼中層02至05室，涉資約1.07億元，同業主今年初叫價「平」約22%外，呎價只約1.57萬元，低市價約25%，亦係該廈兩年以來新低呎價。

佢話，目前傾緊幾單商用物業，估計投資額高近15億元。其實，Jeffery個舅父紀惠集團行政總裁湯文亮早排都話，今年下半年睇啱機會會出手執平貨。

資深投資者「物流張」呢個月初豪擲約1.13億元，買入銅鑼灣謝斐道兩層零售樓面，比起業主今年初意向價低近30%，佢話今次係「辣招」後最大手入貨，計起上嚟平均呎價只係約1.17萬元。雖然今次要比960萬雙倍印花稅，但比起原業主本月初叫價已有約4,700萬元嘅折扣，所以十分吸引，估計件貨現市值去到1.5億元。

基金拆售豪華廣場舖

近排有商場地庫拆售反應佳，有消息話，鵬里資產管理或有關人士舊年中斥超過5億元向「玩具大王」蔡志明買嘅荃灣豪華廣場全幢，聽講物業已改名為百悅坊，基金想效法「劏細」賣，諗住先拆售10層中層樓上舖，每層市值呎價8,000至9,000元，即每層5,000幾萬有交易，賣晒已夠回本。

另一方面，有代理收到風，話有間連鎖超級市場喺屯門同元朗正洽租緊舖位擴充，包括以每月約32萬元傾緊租用屯門居屋富健花園一個地舖，面積約7,000方呎，同埋以每月約26萬元傾緊元朗合益廣場1樓一個舖位，面積約7,800方呎。