太陽日誌

儘管聯儲局主席伯南克出爾反爾，話美國經濟依然需要寬鬆貨幣政策支持，不過，資金棄債投股的「大輪轉」，看來未有因此中斷，並且有開始進入白熱化的迹象。上星期環球基金在債券市場錄得100億美元淨流出，股票基金錄得六個月以來最勁的197億美元淨流入，其中流入美股的創○八年六月以來最多，達170億美元，心水清的可以睇到，環球大孖沙儘管風險胃納回升，不過資金相當選擇性流晒去華爾街，對未見經濟谷底的中資股，顯然是興趣麻麻。

太陽日誌

綜合大行預測國美業績（人民幣）

今年中國股市已累積51.4億美元淨流出，是新興市場最傷的一員。至於港股，連同上星期五的17點進帳，整個星期累積升85點，但連續五日成交都係得「四」字頭，減埋近半來自輪場，靠佣金過活的經紀，真係有苦自己知。

未平倉合約急增

恒指成個星期困在21,205至21,460點之間，專門炒輪炒期指的即市玩家，睇怕一樣無啖好食。雖然距離七月期指結算已時日無多，但上星期水盡鵝飛的市況下，期指未平倉合約不跌反升近5,000張，睇現貨成交唔似套戥盤，加埋周五沽空成交激增，A股亦已連跌三日破晒位，睇格局似係大暴風雨前夕的寧靜。

上星期五傍晚，人行宣布利率市場化改革邁出重要一步，落實包括取消貸款七折利率下限以及取消票據貼現利率管制等，本以為內銀實死無生會拖冧港股，但從當晚預託證券推算，恒指有三十幾點進帳，而新加坡外圍港期亦升80點，連MSCI香港指數iShares都有0.38%升幅。

依家內地人民幣貸款以基準利率以下定價的，佔總貸款唔到12%，近期錢荒，打折比例更少，既然人行向被溫總形容為暴利行業的內地銀行開第一槍，近期AH股市又草木皆兵，好消息唔升，壞消息跌凸，話就話利率市場化久聞樓梯響，而估值平到暈的內銀，或多或少亦已反映這日遲早來臨，但史提芬認為，最好仲係睇多兩日市場反應至算。

國美電器（00493）發盈喜，預告半年虧轉盈，上周五炒高11%，報0.79元，252球成交，好耐未見過咁大場面。按公司所指，第二季純利較首季有100%增長，首季賺7,633萬元（人民幣．下同），即第二季純利1.52億元以上，半年盈利2.28億元，街外預測全年賺4.55億元，中期完成一半。

不過，估計六月開始無節能家電補貼，第三季同店銷售增長有可能放緩，相信到時先至會見到真章。但姑勿論點，依家國美市帳率得番0.77倍，同五年平均2.2倍比，得番三分之一多少少，加上啱啱升破50日線，或有機上去試一試0.9至0.95港元阻力位。