股海實戰：中興 醞釀展升浪

手機股現洗倉潮，上周五瑞聲（02018）遭摩笛追魂，股價曾挫9%；榮陽（02078）上市冇耐發盈警，股價急跌17%；其他如舜宇（02382）及信利（00732）同跌半成。講到摩笛，經常有未來幾多日某股升跌之類嘅預測，呢個「斷估」方法實在叫人不敢恭維，還記得五月下旬摩笛話宏華（00196）未來六十日股價上升機會大，但結果宏華股價由五月下旬3.9元水平碌到落上周五低位僅2.21元。

憧憬補貼措施出台

環保部話本月底下月初將出台「大氣污染防治行動計劃」，風電、水務，環保汽車業料成焦點。另外，雖然財政部長講到明，年內唔會有大規模嘅財政刺激措施出台，但美銀美林就預計，下半年內地將推細規模（約1,500億元人仔）嘅刺激措施以穩經濟，這包括加大公共房屋、基礎建設和鐵路等嘅政府開支，以及針對節能環保、4G網絡及寬頻等資訊科技範疇推出補貼或稅務優惠等。

講到4G，下月三大中資電訊商將會宣布中績，喺智能手機日趨普及，消費者對增值服務需求增加下，相信中績會有好表現。其中聯通（00762）上周披露六月份數據，3G用戶已突破1億戶，六月份淨增長為413.3萬戶，而整體總移動用戶則達2.62億戶，六月份淨增長380萬戶。顯然，過去幾年聯通積極投放3G網絡，如今陸續見到收成，相信良好嘅中績表現可為股價帶來支持。走勢上，次季兩次成功考驗9.5元水平承接，如無意外本周10日線可重上50日線，有勢再試250日線11.6元阻力位。

其實，若然三大電訊商要大搞4G網絡，最得益嘅係中興（00763）。上周五其A、H股仍在停牌，話有待公布股權激勵計劃詳情，公司對上一次股權激勵計劃喺○七年推出，兩年禁售、三年限售過後，股價曾翻一番有多。如今公司股價處於近五年低位，適逢又係4G發牌前夕，呢一刻落實新嘅股權激勵計劃，Timing可謂靚絕，話唔定真係預示業務將重拾增長軌道，股價將迎來新升浪，長線投資者不妨多加留意。