沙田九肚第56A區B6地盤將於周五截標，估值介乎約12.1億至13.45億元。(資料圖片)

近年「賣地常客」必定係沙田九肚地皮，區內8幅地唔覺唔覺都批出咗其中5幅，而今個禮拜五就輪到B6地盤截標，呢幅地皮總樓面只係約13.4萬方呎，估值最多都係約13.45億元，規模比起賣地表餘下嘅兩幅九肚地為細，除咗新地（00016）及信置（00083）等區內擁地嘅大發展商外，睇嚟中小型財團都會把握「最後機會」積極競投。

沙田九肚第56A區B6地盤將於周五截標，估值介乎約12.1億至13.45億元。(資料圖片)

美聯林子彬預計，財團對九肚地皮有一定興趣。(資料圖片)

本周兩幅截標住宅地皮資料

最近將軍澳南最後兩幅限量地售價唔係咁好，不過地皮數量踏入倒數階段嘅沙田九肚，始終係傳統豪宅地段，又無限量條款，劉Sir同班業界老友都唔太擔心地皮嘅反應，今次截標嘅沙田九肚第56A區B6地盤，估計每方呎樓面地價約9,000元至1萬元，以總樓面約13.4萬方呎計算，估值大約12.1億至13.45億元。

賣地表同區僅剩兩幅

唔計呢幅B6地盤，沙田九肚喺賣地表上得番沙田第56A區兩幅地（沙田市地段第578及579號），不過呢兩幅地總樓面都超過30萬方呎，應該係大發展商嘅囊中物，所以上述B6地盤已經係區內最後一幅中型規模地皮。

唔少測量師老友都覺得地價同參與度唔會差得去邊，美聯林子彬話，地皮屬於中型規模，預計財團會有一定參與度，就算將軍澳南限量地近排地價一般，但對豪宅地影響實在有限，佢估計今次九肚地每方呎樓面地價約1萬元；而韋堅信測量師行林晉超都話，九肚豪宅地係高檔次項目，地價未必會咁壞。

屯門限量地料值5.7億

劉Sir同大家回顧一下，沙田九肚至今已有5幅土地批出咗，成交每方呎樓面地價介乎約5,332至10,884元不等，之不過，喺一一年賣出、成交每方呎樓面地價只約5,332元嘅沙田九肚第56A區A地盤，由於總樓面超過100萬方呎，兼有限量條款，唔能夠做參考對象，而其餘4幅地皮成交樓面呎價就由約9,551元起，所以相信B6地盤嘅樓面呎價都唔會差好遠。

同日截標仲有屯門小秀第55區青山公路大欖段限量地，項目須提供最少175伙，估值約5.58億至5.74億元，每方呎樓面地價約3,500至3,600元。