股海實戰：中國安芯 炒業績

華潤系五股尋日未有停牌，公司發澄清，但未能釋疑團，小股東聯盟喺內地開記招表明堅持向香港高院追究董事責任，又有傳中紀委已受理實名舉報，總之七國咁亂。阿莊仲好記得，呢十幾廿年不乏大紅籌高層涉貪例子，如中旅前老總朱悅寧等，最終被召回京處理了事，今次會唔會又係以易帥平息，不得而知，但睇嚟咁搞一搞，潤電（00836）同潤燃（01193）合併計劃或生變。事實上，自公布合併建議後，潤電股價一直被拖下去，若然下周一股東特別大會否決合併建議，話唔定股價有得彈！

大市不濟股仔落鑊

生意淡薄，不如賭博。尋日見到升幅榜中，不乏三、四線股名字，如中國仁濟醫療（00648）及永保林業（00723）股價同升逾兩成；另中國源暢（00155）急升44%、新城市建設（00456）升18%。呢啲股仔勝在價細好炒，但炒作風險高，隨時「停車熄匙」，食得鹹魚要抵得渴！

主要從事ISD系統及智能安全系統（ISS）業務嘅中國安芯（01149），上月起交投明顯轉趨活躍，股價一度衝上2.21元，之後隨市況回落至50日線約1.8元水平整固，上周又再重上2元關，尋日收報2.04元。公司主要從事工業安全及環保監測ISD系統，而新興嘅公共安全ISS系統亦具發展潛力。去年公司賺5.47億元，同比增長36%，經營現金流淨額增逾八成至6.18億元，手持現金及等值15.8億元，並無銀行借貸，現價往績市盈率10倍。估計公司將於下月公布中績，此前可望多兩眼，短線調整守穩50日線1.86元樓上有得諗，向上主要阻力喺2.3元水平。

文化中國吼位落注

騰訊（00700）有投資嘅文化中國傳播（01060），最近搵高盛做代理，配股集資兩億幾銀（每股作價0.46元），阿莊相信高盛肯接呢單「刁」，唔係因為生意唔好而大小通吃，而係因為間公司可能仲有大「刁」跟尾，高盛博做埋一條龍服務嘅可能性較大。聽聞呢次配股冇咩點流出街，公司早前發盈喜，又向三個基金配售認股權證，行使價0.5元，睇牌面有得博吓，阿莊打算喺0.5元樓下落第一注。