九龍塘百美花園單位獲四名內地學生合租，而且更一次過支付一年租金。（資料圖片）

今個暑假再掀內地學生搶租潮，今年仲搶到去傳統豪宅區。有4個就快開學嘅內地學生租客，即睇即畀晒一年19.2萬元租金，租咗九龍塘百美花園一個中層單位。而大圍名城租盤亦被搶貴，內地生以實用呎租37.7元租咗個單位，創全屋苑新高紀錄。

九龍塘百美花園單位獲四名內地學生合租，而且更一次過支付一年租金。（資料圖片）

內地學生租樓個案

美聯林彩霞向劉Sir報料，連傳統豪宅區嘅九龍塘都有內地學生搶租，近排就有4個內地學生來港讀書，睇咗區內百美花園中層B3室租盤，建築/實用面積530/445方呎，雖然只係一房單位，但一睇已經即刻畀晒成年19.2萬元合租個單位，平均每個月都係1.6萬元，建築/實用呎租約30.2/36元。

名城實呎租37元新高

利嘉閣冼志勇話，內地學生租客早就撻着名城租市，近日有4至5個內地學生，用每個月約2.55萬元租金，夾份租咗名城2座北翼中層A室，建築/實用面積901/677方呎，建築/實用呎租去到成28.3/37.7元，創咗名城呎租紀錄。

至於沙田第一城，中原黎浚宇都話，今個月買賣慘淡，只錄到大概13宗成交，相反有內地學生頂住租市，今個月有成近50宗租賃成交，好似3座中層E室，有3個內地學生客以每個月約1.65萬元租咗，實用呎租36.6元。買賣成交都有，好似45座中層B室，但要減價10萬元賣320萬元。

據講，內地學生向來適應力強，租公屋都無問題。有代理爆料，粉嶺華明邨中低層單位，建築面積620餘方呎，內地學生月租9,600元照租，建築呎租都去到成15元。

屋苑呎租連跌三個月

利嘉閣研究報告指出，六月全港50個指標屋苑錄約1,286宗租賃成交，按月少咗12宗，相反樓市觀望氣氛濃厚，平均建築呎租按月再跌0.2%至25.31元，連跌三個月，呎租創近八個月新低。中原盧鏡豪講，有資深投資者持有嘅鴨脷洲海怡半島「豪裝」相連單位，以每月5.2萬元租出，建築/實用呎租33.3/41.1元。