四環醫藥(00460)尋日以全日高位兼新高5.3元收市,升近2%,集團業務食正人口老化商機,優質藥股揸短中長線都得。

主攻心腦血管處方藥業務嘅四環,去年共有32項專利,市場佔有率增至8.1%,今年初旗下 I 類創新藥品數目已達四種,反映研發能力有優勢。有指下半年內地進行國家醫保招標,相信有利公司業務持續增長。另外,大摩出報告叫人買,話佢○三年推出的「克林澳」同「川青」已被納入廣東省基本藥物名冊,有助推動產品銷售,同埋減輕降價壓力,因為去年兩者基數都較低,今年上半年業績應該唔錯,估計股價將於未來60日上升。

睇番幅圖,股價自去年底起沿住50日線上升,期間出現幾次假跌穿,但依然能夠屢創新高,未有貨嘅話,可以候回吐睇位收集,唔大貪先睇6蚊。

四環醫藥(00460)

阻力位: 6.00元

支持位: 4.82元