太陽日誌

聯儲局公開六月十八、十九日會議紀錄，同市場預期及上兩次紀錄相差唔大，較多委員認同要美國就業市場有更大改善，先開始減少買債步伐。勢估唔到，紐交所收市後，伯南克在記者會的Q&A中提出，市場資金太緊張，勢必影響聯儲局維持物價穩定及促進就業的目標，並提出唔會在失業率降至6.5%後立即加息，至少等失業率維持該水平一段時間先諗。

太陽日誌

綜合大行預測聯想業績（美元）

先前美債因為憂慮收水急跌，十年期債息由低位反彈超過1厘，顯然伯南克怕金融市場融資成本升得太快，窒礙經濟復甦，最可圈可點嘅仲係之後補充的一句：「在可見的未來，非常寬鬆貨幣政策是美國經濟所需」，對恐懼升息的投資者，可算係賣晒大包。之後財經傳媒搵IMF首席經濟學家Olivier Blanchard做訪問，佢認為美國經濟無過熱迹象，更見唔到通脹預期升溫的情況，根本唔使咁快擔心通脹。財金猛人畫公仔畫到出腸，美元低息及貨幣寬鬆政策，唔會一如極端預測般九月份就完結，股市既有低息，又有經濟復甦故事可炒，睇嚟美股短期係高處未算高也。

之前炒提早退市，美元強，美債弱，但伯老幾句說話後，成個trend有行番轉頭之勢。港股報復式反彈，恒指升532點，報21,437點，主板成交730億，是近十個交易日以來最旺。

尋日大市升勢，主要集中在近期超跌的中資股及炒緊七月新增貸款大鬆綁的重磅內銀，這類股份基金之前洗得就洗，已經無乜攔路虎，估計恒指反彈較大阻力，要去到21,857至21,951點，即係50日線及0.618反彈。雖然尋日係升得急啲，但睇落至少仲有幾百點水位博吓。

聯想可逢低收集

據行業統計數據顯示，聯想（00992）在全球PC市場的佔有率已升至16.7%，取代頭號敵人惠普，穩坐龍頭位置。受相關消息刺激，昨其股價升3.6%，收報7.15元。不過，面對智能手機及平板電腦等產品的興起，全球PC市場增長正放緩，聯想雖取得一哥地位，但接下來更艱巨的任務，是把握新興市場PC業務的優勢，加快拓展智能手機、平板電腦以及智能電視等業務，以維持中長期增長。

今年以來，聯想既已進身藍籌行列，又成為全球PC業一哥，股價表現應值得期待。展望未來三年，估計同系即將出現的新里程碑，包括母公司實現整體上市、聯想登陸A股市場，以及分拆成熟業務。若然聯想繼續致力提高股息率，應可吸引更多大型基金長期捧場，長線投資者可留意逢低收集的機會。