水務股收益基礎穩定，但入市策略只宜在股價回軟時收集，不宜胡亂高追。(資料圖片)

前晚伯老講話派定心丸，加上前日傳出有「暴力哥」入市嘅A股尋日持續做好，港股乘機挾淡倉，恒指一度抽穿21,500點，收報21,437點，升532點，成交回升至730億元。一直積弱嘅國壽（02628）發威，股價狂飆6.4%，內銀、內險、券商及內房股全線做好，主要係消息指七月首周內銀新增貸款急彈，以及盛傳內地擬放寬房企融資所刺激。阿莊都講過，恒指反彈至21,500點水平將現較大阻力，相信尋日已到咗本輪反彈目標，後市要成功重上250日線（21,629點）及50日線（21,857點），必須要有大成交及利好政策消息作配合。

水務股收益基礎穩定，但入市策略只宜在股價回軟時收集，不宜胡亂高追。(資料圖片)

中燃似有開車迹象

周初話要買嘅券商股一路係咁升，尋日中信証券（06030）及海通證券（06837）升6至7%，冇等低位就上車嘅真係嗒糖！此外，沽出不久嘅中國燃氣（00384）真係開口中，一沽就行，尋日成交大增，股價一度衝上8.37元，為怕又一次被飛甩，又買番兩萬股等運到。

美國「退市」同中國經濟表現將繼續主導下半年魚缸表現，摩通最近嘅中國市場報告值得參考，佢話短期要緊盯兩件事，分別係七月嘅北戴河會議同七月十五日公布嘅次季GDP數據，而下半年則宜關注七至八月份嘅企業業績以及九月份嘅三中全會。再睇滬綜指走勢，前日10日線失而復得，尋日升勢持續，短線有回穩迹象，而下兩個較大嘅阻力喺2,100點及2,160點。

上月中旬，阿莊曾推介過水務股，話即使內地經濟增長放緩，水務股具防守性。上月底港股大幅波動，水務股亦曾現地震，但即市便可由低位反彈，好快便收復失地回穩。前日光大國際（00257）發盈喜，預計上半年綜合經常性稅後盈利同比將顯著上升，刺激尋日股價升4%。投行相繼發報告，其中美銀美林維持其目標價喺7.2元，花旗則上調目標價至7.4元。

翻查資料，光國去年中期賺6億元，全年賺11.2億元，若今年上半年純利同比大增，相信其全年盈利預估仍有上調空間。不過，緊記水務股收益基礎相對穩定，屬公用股性質，故入市策略宜喺股價回軟時收集，14日RSI顯示超賣時沽出。

技術上，光國10日線有勢重上50日線，黃金交叉出現，可進一步確認向上嘅大方向。尚未持貨嘅話，可待股價回吐至6至6.2元水平入場，年底目標挑戰7元關，主要支持已上移至5.6至5.8元區域。