啱啱改名嘅富智康（02038）暫時回一回氣，近一個月股價喺波幅區間3.72至4.45元停滯不前，尋日上升0.7%至3.95元，可以候機炒波幅，高沽低買，阻力睇五十二周高位4.45元。

尋日有報道指富智康母公司鴻海精密旗下鄭州廠區正在大量請人，準備幫蘋果生產iPhone 6，姑勿論單料係咪堅，查實富智康對佢嘅依賴已經減少。大摩亦話公司上半年經營有改善，令到市場信心恢復，估計股價將於未來60日上升，叫人增持。

進軍台灣4G市場

另外，母公司除與Mozilla合作Firefox OS裝置外，仲決定咗進軍台灣4G市場，同其餘6個申請者去爭4至7個牌照，旨在以合作等形式進入電訊行業，有利提升智能手機、平板電腦等產品的銷售及服務，作為全球手機代工巨頭的富智康料可受惠。

富智康（02038）

阻力位：4.45元

支持位：3.72元