太陽日誌2013/7/10

近期港股成交愈玩愈縮，短線走勢變得時好時壞，難以捉摸。前晚歐美股市高收，港股跟隨尋日高開28點後，最多升過185點，收市升幅收窄至100點，報20,683點，成交440億元，是五月廿七日以來最低。睇埋六月期指未平倉合約，得9.57萬張，低於過去幾個月平均的10萬張樓上。內地股市亦十足十休市一樣，上海股市成交額創今年新低，認識的基金經理，部分見半年結後，短期無故事好炒，索性一動不如一靜。

太陽日誌2013/7/10

美銀美林預測創維業績（港元）

死硬派或者仲堅持股市要睇埋周四凌晨聯儲局主席伯南克出席經濟研究局會議的發言，以揣摩美國退市時間表，但睇見十年美債息已挾上2.7厘，低位足足反彈1.1厘，「就快退市」幾乎已經寫喺伯南克個額頭上面，近兩日歐美股市回升，或多或少反映投資者逐步接受經濟復甦下，超低息日子快將完結的事實。而上半年弱過藥煲的中港股市，未來一季可能只會在極超賣的情況下才會出現技術反彈。

尋日內地公布六月份通脹及生產者價格指數，CPI及PPI分別升2.7%及跌2.7%，PPI同預期接近，但持續下滑凸顯了內地經濟疲弱，需求不振的情況持續，但按年跌幅有收窄迹象，下半年企業業績有可能稍勝上半年。通脹因為今年天氣較熱刺激糧食價格高企，升至2.7%，比上月及市場預期的2.1%及2.5%高，意味留給政府的操作空間減少。

中國的節能家電補貼玩到五月，創維（00751）六月營運數據，見到初步的影響，六月中國分部電視銷貨量按年跌17%，但銷貨額有2%升幅，估計與售價較高的雲電視，佔售出產品比重提升有關。總括第二季內地電視銷售量及金額，分別有27%及35%增長，連同海外業務，則升38%及42%。

創維壞消息已反映

五月初，創維股價見過6.67元，至今累積跌四成七，基金趁補貼完結前沽貨外，內地樂視網賣大包推出的7,000人仔樂視60吋網絡電視，開始付運，心理上不無影響，較淡的大行估創維今年賺15億，同舊年差唔多，市盈率6.4倍，壞消息可能已在股價中反映得七七八八，但炒唔炒得番上去，仲要睇4K電視係咪真係掀起新一輪換機潮。

今年大市缺乏主題，個個賓架睇住阿里巴巴上市，由路邊社消息，估值愈吹愈誇張！情況有啲似二千年科網熱，單係騰訊（00700）及網龍（00777）等內地網股，今年完全唔見受跌市影響，可見一二。

常言道Buy on rumor sell on fact，近期A股無論係賺唔賺到錢的網股，都因為影子效應而炒到癲，大膽講句，有乜股票實升唔敢包，但幾乎可以肯定，阿里巴巴一旦落實招股並開始路演，極有可能正係一眾內地網股見頂之時。而公司新任首席執行官陸兆禧，啱啱在港會見傳媒，似乎是好事近矣。