電池板塊因基金洗倉,今年累跌幅度驚人,相信已足夠反映相關負面因素。(資料圖片)

夏日炎炎正好眠,呢排對住金魚缸,除咗「眠一眠」之外,真係冇咩好做,好似尋日大市成交縮到得番442億元,恒指表現反覆,全日波幅唔夠兩百點,真係十足「抖暑」格局!

電池板塊因基金洗倉,今年累跌幅度驚人,相信已足夠反映相關負面因素。(資料圖片)

表叔分析,特區政府為打擊樓市炒風而推「辣招」,除咗係為香港樓市降溫之外,某程度亦係要配合上大人整頓市場秩序,以免香港股樓成為內地貪官污吏嘅私人金庫。好似尋日市場便傳出,濠江擬採新措施對付洗黑錢。

本地經濟前景堪憂

講到樓市,美銀美林最近話,樓價波動將影響經濟活動、銀行放貸,以及樓市表現,並對私人消費及投資造成影響,估計若明年樓價跌15%,香港GDP增長預測便須由原先嘅3.8%下調至2.8%。若樓市嘅負面情緒擴散至股市,並拖累恒指出現類似幅度嘅調整,則GDP增長預測尚有再進一步下調嘅風險。所以話,依家仲用往績市盈率來衡量股市平貴,實在不切實際!

創維(00751)公布六月份電視機銷售總量同比增長11%,但中國彩電事業部銷量同比減少17%,按月跌59%,正反映家電業補貼到期不獲續推,以及經濟增長持續放慢嘅負面影響。回顧次季以來,創維及TCL多媒體(01070)股價已由高位累跌四成多,季內能否完成尋底,要視乎上大人如何落實「有保有壓」策略,喺去槓桿化及保持經濟穩定增長二者中取得平衡。

板塊方面,近月兩隻遭洗倉嘅電池股,近周開始回穩,前日天能(00819)股價重上3元後,尋日繼續反彈,收報3.13元,升2.9%;而超威(00951)則由上周低位2.38元反彈至尋日高位2.7元。

事實上,呢兩隻股份今年以來市值已蒸發一半有多,照計已頗大程度反映上半年利潤大降嘅因素。至於跌夠未,就要視乎嚟緊業績會唔會「見紅」,以及行業門檻是否如期於年底再次提高。

走勢上,天能企穩10日線樓上短線反彈尚可持續,下一個較大嘅阻力位喺3.5元,初步支持喺2.88元;至於超威的初步阻力則喺3元,回吐宜守2.45元。