旺角居屋富榮花園有車位以約115萬元售出。(資料圖片)

住宅樓市近乎「拍烏蠅」，但車位市場繼續受追捧，湧現高價及高租情況。在需求帶動下，旺角市區居屋富榮花園有個地下車位，啱啱賣咗115萬元，成為全港居屋車位王。另將軍澳天晉亦錄首宗車位租賃成交，月租去到4,000元，創下全區車位月租新高。

旺角居屋富榮花園有車位以約115萬元售出。(資料圖片)

近日車位被搶高情況

近排奧運站幾個屋苑都賣車位，連附近居屋富榮花園車位都被「煲起」。有代理同劉Sir講，富榮花園附近啲車位都少得幾緊要，所以好多私樓車主，都要喺富榮花園「搵位」，帶動個價係咁升，尤其係近地下嘅靚位，近日就有個地下車位，賣咗成115萬元，成為全香港最貴嘅居屋車位。

將軍澳貨好賣租又貴

其實富榮花園車位一向都幾貴，三月嘅時候做過102萬元，已經破晒全港居屋車位紀錄，同區私樓一手車位都係賣120幾萬元起。

家天下黎振傑講，富榮花園車位租盤向來無貨，前幾日有個單號車位朝早放租，下晝即時3,400元畀人租咗，依家屋苑無車位租盤，買賣放盤約10個，叫價85萬至125萬元。

車位好賣，同時好租。美聯馬立成就話，天晉未有車位賣，但已經有少部分跟特色單位分配嘅車位租出，一個雙號車位以每月4,000元租出，創全將軍澳車位月租新高，其實天晉9個單位先有1個車位嘅比例，難怪車位租金咁高。

而同區車位月租好似首都同君傲灣，最高做緊3,000至3,300元。而天晉附近可以租畀街外人嘅將軍澳廣場車位，月租約2,700至2,900元，未來車位需求都會幾渴市。

何文田露天位搶高67%

拍賣場車位都被搶，好似何文田亞皆老街寶雲閣地下有一個露天車位，尋日由拍賣行以12萬元開拍，雖然係「無瓦遮頭」嘅露天位，但劉Sir見到有至少四個人爭住舉手，最後爭咗11口價賣咗20萬元，比開價足足高咗近67%。