從事LCD業務（包括觸控屏及汽車顯示器）的信利國際（00732），食正智能手機熱潮，今年初推介時仲係得嗰兩個幾，依家股價已經成功翻一番，雖然之前一度碌到落3.05元，不過尋日逆市爆上，升幅12.5%，配合10日線有拗腰升穿100日線迹象，話唔定可以開始新升浪。

信利啱啱發盈喜，預期截至今年六月底止六個月淨利潤將比去年同期大幅增長，原因係期內收益大幅增加。根據未經審核數字，公司六月營業淨額增長九成至18.48億元，而上半年營業淨額增長逾六成至86.66億元。自一○年起，佢嘅盈利同股息均持續增長，上月旗下附屬更斥200萬美元收購富元精密鍍膜公司5.79%權益，拎到3.5代OGS電容屏生產線約30至50%大板產能支持，有助進一步提升OGS電容屏產品競爭優勢。至於公司喺跌市當日（六月二十五日）回購咗1,856萬股，每股3.05至3.53元，涉及金額6,284萬元，有支持作用。

信利國際（00732）

阻力位：5.37元

支持位：3.87元