安踏訂單情況漸見改善，一旦確認業務重拾升軌，長線投資者可多加關注。(資料圖片)

港股呢期真係弱過藥煲，美股上周五高收唔跟，反而跟足A股走低，恒指尋日一度跌600點，午後跌幅收窄，但埋單仍要跌272點，收報20,582點，成交524億元。呢啲市買賣兩閒，大戶容易將指數舞高弄低，故筆者已一再強調，依家玩指數牛熊證冇着數，都係着眼長線，集中火力發掘值博個股較實際！

安踏訂單情況漸見改善，一旦確認業務重拾升軌，長線投資者可多加關注。(資料圖片)

福記（01175）尋日復牌，由於唔少股東慶幸投資本金獲解凍，打九折都照沽貨套現，故見早段一度插到落1.77元，阿莊就見有股友膽粗粗入市撈底，結果畀佢博得中，即市以2.5元食胡，其後股價曾高見3.06元，收報2.48元，跌93%，但仍較早前嘅供股價0.74元為高。相信喺復牌初期，呢隻股股價仍會較為波動，小注跟炒即日鮮，必須要訂下止蝕位。見尋日尾段冇咩力水，如今最好係等佢再試尋日低位（1.77元）支持，先至好諗博反彈。

A股短期難睇好

尋日A股受壓，其中一個原因係話IPO將會喺月底前重啟，但其實呢個消息喺上周五已瘋傳，講到底A股市底偏弱，隨手可以找來下跌理由。有指本月中內地將召開中央經濟工作會議，但從尋日A股表現推斷，相信會議唔會有咩重大利好消息。近日財政部下發通知，要求中央國家機關各部門對今年嘅一般性支出統一按5%比例壓減。可見，如今內地市場流動性已大不如前，加上中央大力肅貪，官員冇咗好多搵快錢嘅機會，加埋各部門縮減開支，地方財政偏緊，經濟將由「燦爛」歸於「平淡」。

其實，環顧一眾中資股，體育用品股算係最先進行大型調整嘅板塊。以龍頭股安踏（02020）為例，股價由一○年十月高位18.76元，回落至舊年七月低位4.03元，累跌幅度近八成，今年以來股價主要喺6至8元水平上落，某程度反映公司致力清理庫存及整頓零售網絡嘅策略獲市場認同。喺A股正處尋底之旅當中，最先下跌嘅板塊開始靠穩；當A股見底回穩，呢批股份有機會率先重拾升軌。喺一眾體育用品股當中，本來李寧（02331）名氣稍高，但礙於「玩財技」嘅印象深入股民心，要揀四平八穩嘅，仍以安踏較為可取。

五月份，安踏披露今年第四季訂貨會之訂單金額雖有所下跌，但已較首三季度有所改善。相信明年上半年嘅訂單表現，將可確認業務是否已重拾正軌。季內股價若能守穩250日線6.2元之上，可進一步確認回穩，值得長線投資者多加關注。